Ýurdumyzda saparda bolan Özbegistan Respublikasynyň Prezidenti Şawkat Mirziýoýew we hormatly Prezidentimiz Serdar Berdimuhamedow paýtagtymyzdaky «Daşkent» medeni dynç alyş seýilgähiniň açylyşynyň çäklerinde teleköpri arkaly Türkmen-özbek serhetýaka söwda zolagynyň — Söwda merkeziniň düýbüni tutmak dabarasyna gatnaşdylar.
Mälim bolşy ýaly, türkmen-özbek söwda-ykdysady gatnaşyklaryny has-da giňeltmek maksady bilen, serhetýaka zolaklaryň — Türkmenistanyň Lebap we Daşoguz welaýatlarynyň Özbegistanyň Buhara hem-de Horezm welaýatlary bilen ikitaraplaýyn hyzmatdaşlygynyň ösdürilmegine aýratyn ähmiýet berilýär. Şunda geçen ýylyň oktýabrynda Türkmenistanyň we Özbegistanyň Hökümetleriniň arasynda serhetýaka Türkmen-özbek söwda zolagyny — Söwda merkezini döretmek we onuň işini düzgünleşdirmek hakynda Ylalaşyga gol çekilendigini bellemek gerek.
Hususan-da, hormatly Prezidentimiz Serdar Berdimuhamedowyň şu ýylyň iýulynda goňşy Özbegistana amala aşyran ilkinji döwlet saparynyň jemleri boýunça kabul edilen Bilelikdäki Beýannamada iki ýurduň Liderleriniň Türkmen-özbek serhetýaka söwda zolagyny — Söwda merkezini döretmek boýunça işleriň çalt tamamlanmagynyň zerurdygyny bellemekleri şu gün serhetýaka söwda zolagynyň dabaraly ýagdaýda düýbüniň tutulmagyny şertlendirdi. Bu merkeziň işi özara söwdanyň möçberini artdyrmaga, senagat kooperasiýasyny ösdürmäge hem-de bilelikdäki taslamalary amala aşyrmaga ýardam etmäge gönükdirilendir.
Ýeri gelende bellesek, Özbegistan Türkmenistanyň iri söwda-ykdysady hyzmatdaşlarynyň biridir. Soňky bäş ýylda özara söwda dolanyşygynyň möçberi 5 essä golaý ýokarlanyp, geçen ýylda bu görkeziji 902 million amerikan dollaryna barabar boldy. Özbegistanyň resmi gulluklary türkmen-özbek söwda dolanyşygynyň şu ýylyň dokuz aýynda 570 million amerikan dollaryna golaýlandygyny habar berýärler. Häzirki wagtda Özbegistanda türkmen maýa goýumynyň gatnaşmagynda döredilen kärhanalaryň 173-si hereket edýär.