2023-nji ýylyň 11-nji oktýabrynda Türkmenistanyň Söwda-senagat edarasynyň döwrebap binasynda Türkmen-özbek işewürler geňeşiniň 3-nji mejlisi geçirildi. Türkmenistanyň Söwda-senagat edarasynyň başlygy, türkmen-özbek işewürler geňeşiniň türkmen tarapynyň başlygy M. Gurdow giriş sözi bilen çykyş edip, Türkmen-özbek işewürler geňeşiniň 3-nji mejlisiniň işiniň üstünliklere beslenmegini arzuw etdi.
Türkmen-özbek işewürler geňeşiniň 3-nji mejlisiniň gün tertibine Türkmenistanyň we Özbegistan Respublikasynyň söwda-ykdysady mümkinçilikleri, Türkmen-özbek serhetara söwda zolagynyň häzirki wagtdaky ýagdaýy, senagat, ulag we logistika ugrunda işjeňligi has-da giňeltmek meseleleri girizildi.
Şeýle hem Özbegistan Respublikasynyň milli sergisini Türkmenistanda guramagyň we Türkmenistanyň milli sergisini Özbegistan Respublikasynda geçirmegiň mümkinçilikleri ara alnyp maslahatlaşyldy.
Türkmen-özbek işewürler geňeşiniň 3-nji mejlisiniň çäklerinde Özbegistan Respublikasynyň Söwda-senagat edarasynyň başlygynyň orunbasary Jamşed Urakowyň ýolbaşçylygyndaky wekiliýet bilen Türkmenistanyň Söwda-senagat edarasynyň wekilleriniň we agzalarynyň duşuşygy geçirildi.