Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Eýran Yslam Respublikasynyň Prezidenti Masud Pezeşkianyň arasynda telefon arkaly söhbetdeşlik boldy. Onuň dowamynda ikitaraplaýyn hyzmatdaşlygyň möhüm meseleleri boýunça pikir alşyldy. Bu barada “Watan” habarlar gepleşiginde bellenilip geçildi.
Telefon söhbetdeşliginiň başynda türkmen halkynyň Milli Lideri Masud Pezeşkiany hormatly Prezidentimiziň adyndan, hut öz adyndan hem-de Türkmenistanyň halkynyň adyndan Eýran Yslam Respublikasynyň milli güni – Ynkylap güni bilen gutlady.
Şu ýyl Türkmenistan üçin şanly wakalara beslenýär. Bellenişi ýaly, BMG-niň Baş Assambleýasy Türkmenistanyň başlangyjy bilen 2025-nji ýyly “Halkara parahatylyk we ynanyşmak ýyly” diýip yglan etmek hakynda kararnama kabul etdi.
2025-nji ýylyň 12-nji dekabrynda Aşgabat şäherinde geçiriljek Halkara parahatçylyk we ynanyşmak forumy şu ýylyň dowamynda geçiriljek iň esasy çäreleriň biri bolar.
Türkmen halkynyň Milli Lideri forumyň geçirilýän günlerinde Türkmenistanyň hemişelik Bitaraplygynyň 30 ýyllygynyň belleniljekdigini aýdyp, Prezident Masud Pezeşkiany halkara Liderler forumyna we baýramçylyk çärelerine gatnaşmaga çagyrdy hem-de dostlukly ýurduň Prezidentiniň gatnaşmagy bu çärelere üstünlikli geçirmäge uly goşant boljakdygyny nygtady.
Türkmen halkynyň Milli Lideri ýakyn wagtda resmi çakylyk hatynyň iberiljekdigini aýtdy.