Täjigistanyň Futbol federasiýasynyň resmi saýtynda şu gün AFK-nyň Çempionlar ligasynyň we AFK-nyň kubogynyň 27-nji ýanwarda boljak bije çekilişigi üçin gatnaşyjy toparlardan ybarat sebetleri düzdi. Düzülen sebetlere we AFK-nyň çözgütlerine görä, bu ýyl yklym ýaryşynda ýurdumyzyň toparlary bir toparçada çykyş etmez.
Türkmenistanyň çempiony we Kubogynyň eýesi «Altyn asyr» bilen ýurdumyzyň wise-çempiony «Ahal» üstümizdäki ýylda ýene-de AFK-nyň kubogy ugrundaky ýaryşa gatnaşar. Ýöne geçen ýyl çempion toparçalaýyn tapgyrda çykyş etmäge hukuk gazanyp, ikinji toparymyz saýlama duşuşyklaryndan geçmeli bolan bolsa, bu ýyl olaryň ikisi hem toparçalaýyn tapgyrda ýaryşar.
Aziýanyň Futbol konfederasiýasy AFK-nyň kubogynyň öňdäki möwsüminde Merkezi zolakda ýaryşjak ýedi topary 27-nji ýanwarda iki toparça böler. Türkmenistana, Täjigistana, Gyrgyzystana we Özbegistana wekilçilik edýän toparlar toparçalara bölünende, bir döwletiň iki toparynyň bir toparça düşmezligi AFK-nyň berk talabydyr. Şoňa laýyklykda, «Altyn asyr» bilen «Ahal» bu ýyl aýry-aýry toparçalarda ýaryşarlar. Merkezi zolakdaky iki toparçanyň birinde dört, beýlekisinde üç wekil bolar.
Toparçalaýyn duşuşyklar merkezleşdirilen görnüşde geçiriler we toparçalaryň ýeňijileri öz aralarynda zolaklaýyn final duşuşygyny geçirerler.
27-nji ýanwarda boljak bije çekilişikde Merkezi zolagyň birinji sebedine Özbegistanyň AGMK (ýa-da «Nasaf»), Täjigistanyň «Rawşan» toparlary wekilçilik edýär. Ýurdumyzyň çempiony «Altyn asyr» bilen Gyrgyzystanyň çempiony «Dordoý» ikinji sebedi emele getirýär. Üçünji sebetde bolsa Täjigistanyň «Hujand» we ýurdumyzyň «Ahal» futbol toparlary bolar. Gyrgyzystanyň «Alaý» futbol topary dördünji sebediň ýeke-täk wekilidir
Dünýäde bolup geçýän wakalardan habarly bolmak-bu döwrüň talaby!
