Şu gün Türkiýe Respublikasynda Ýeňiş güni bellenilip geçilýär. Bu baýramçylyk Türkiýe Respublikasynyň öz garaşsyzlygy ugrunda gazanan ýeňşiniň baýramydyr.
Mustafa Kemal Atatürküň ýolbaşçylygynda Türkiýäniň goşuny Dumlupynarda duşmanlara garşy göreşip, 30-njy awgustda ýeňiş gazanýar. Şol gün hem ýurtda Ýeňiş güni hökmünde bellenýär.
Bu şanly baýramçylyk mynasybetli Türkiýe Respublikasynyň daşary ýurtlardaky wekilhanalarynda hem dürli baýramçylyk çäreleri guralýar. Şeýle dabaralaryň biri Türkiýäniň Aşgabatdaky ilçihanasy tarapyndan hem guraldy.
Ýeňiş baýramynyň 103-nji ýyly mynasybetli paýtagtymyz Aşgabat şäherindäki Türkiýäniň ilçihanasynyň kabulhanasynda geçirilen dabarada Türkiýäniň Türkmenistandaky Adatdan daşary we Doly ygtyýarly ilçisi Ahmet Demirok hem-de ilçihananyň resmi wekilleri myhmanlary garşylady. Dabara Türkmenistanyň daşary işler ministriniň orunbasary Ahmet Gurbanow we resmi wekilleri, Aşgabatdaky daşary ýurtlaryň diplomatik wekilhanalarynyň ýolbaşçylary, ilçihananyň işgärleri we metbugat wekilleri gatnaşdy.-
“Ata Watan Media” toparynyň hem çagyrylan dabarada çykyş eden ilçi Ahmet Demirok Türkiýe Respublikasynyň Prezidenti Rejep Taýyp Ärdoganyň Ýeňiş güni mynasybetli gutlagy okady. Prezident Ärdogan öz gutlagynda Türkiýäniň gahryman esgerleriniň gazanan beýik ýeňişleriniň geljekki nesiller üçin möhüm bolup durýandygyny belledi. Şeýle hem Ärdogan Türkiýäniň ähli ilatynyň jebisleşip, ýurdy has täze ösüşlere alyp barjakdygyna ynam bildirdi.
Şeýle hem dabarada Türkiýäniň Aşgabatdaky ilçihanasynyň harby wekili hem çykyş edip, Ýeňiş gününiň ähmiýetini belläp geçdi.
Dabarada myhmanlara hödür-kerem edildi.