Eziz Diýarymyzda ilatyň arasynda köpçülikleýin bedenterbiýe-sagaldyş hereketini ornaşdyrmak, şeýle hem ýurdumyzda tennis sportuny has-da ösdürmek hem-de ýaýbaňlandyrmak maksady bilen, Aşgabat şäherindäki Olimpiýa şäherjiginiň Tennis toplumynda Aziýa Tennis Federasiýasynyň 14 ýaşa çenli ýetginjek oglan-gyzlaryň arasynda tennis boýunça «Ashgabat Open 2024» atly halkara ýaryşy uly şatlyk-şowhuna beslener. Halkara ýaryşyna 12 döwletiň 70-den gowrak türgenleri, şeýle hem sport wekiliýetleri gatnaşýar.
Halkara ýaryşyň geçiriljek ýeri bolan Tennis toplumy Olimpiýa şäherjiginiň demirgazygynda ýerleşýär. Bu desgada tennis boýunça halkara we milli ýaryşlar yzygiderli geçirilýär. Onuň sygymlylygy 4000 adamdyr. Aziýanyň tennis federasiýasy (ATF) tarapyndan Aşgabat şäherindäki Olimpiýa şäherjiginiň Tennis toplumy «Tennis boýunça Aziýa sebitiniň okuw-türgenleşik merkezi» diýlip yglan edildi.
Şatlyk-şowhuna we aýdym-sazly çykyşlara beslenen «Ashgabat Open 2024» halkara tennis ýaryşynyň açylyş dabarasynda Türkmen döwlet bedenterbiýe we sport institutynyň «Sagdyn nesiller» tans toparynyň, Türkmen döwlet medeniýet institutynyň aýdym-saz toparlarynyň we paýtagtymyzyň ýöriteleşdirilen sport mekdepleriniň ýaş türgenleriniň görkezme çykyşlary görkezildi.
«Ashgabat Open 2024» atly halkara tennis ýaryşy 2024-nji ýylyň 17-nji noýabryna çenli dowam eder.