Türkmenistanyň Bilim ministrligi tarapyndan «Umumybilim edaralarynda 2020 — 2021-nji okuw ýylyna guramaçylykly başlamagyň we okuw-terbiýeçilik işlerini guramagyň wagtlaýyn gözükdirmesi» işlenip taýýarlanyldy. Oňa laýyklykda, dünýädäki epidemiologik ýagdaýlar nazarda tutulyp, ýurdumyzyň bilim-terbiýeçilik edaralarynda arassaçylyk we zyýansyzlandyryş çäreleri yzygiderli geçiriler, bilim edaralarynda okuwçylardyr talyplaryň sapaklara gatnaşygy bilen baglanyşykly işler täze düzgünler esasynda ýola goýlar diýlip Aýgül Rahymowanyň “Türkmenistan” gazetinde çykan makalasynda aýdylýar.
Makalada şeýle hem şu okuw ýylynda ýurdumyz boýunça 159 müň 374 çaga birinji synpa kabul ediler. Olaryň ählisine däp bolşy ýaly, hormatly Prezidentimiziň adyndan öwrediji kompýuterler sowgat berler. 1-nji sentýabrdan başlap, ýurdumyzyň umumybilim berýän edaralarynda mugallymlaryň 81 müňden gowragy 1 million 400 müň okuwça bilim berer diýip geçilýär. Awtor ýurdumyzyň bilim işgärleri mekdepleri täze okuw ýylyna taýýarlamak, täze iş usullaryny öwrenip, bilim derejesini artdyrmak, okuw-görkezme esbaplaryny taýýarlamak hem-de okuw-usulyýet işlerini innowasion usulda guramak boýunça hemmetaraplaýyn taýýarlyk işlerini alyp bardylar diýip belläp geçýär.