Mälim bolşy ýaly, Sues kanalynda gysylyp galan “Ever Given” ägirt uly konteýner gämisiniň ýetirýän gündelik zyýany 15 million dollara barabardyr. Bir hepdeden bäri bu gäminiň kanaldaky ýüzüşini dowam etdirmegi üçin degişli işler alnyp barylýar. Gämi kanaly beklänsoň, 350-den gowrak gämi kanaldan geçmäge garaşyp dur.
Ýekşenbe güni irden gäminiň aşagyndan 27000 kubmetr çäge çykaryldy; 18 metr çuňluga ýetildi. Şeýle-de bolsa, takmynan 20 müň konteýner alyp barýan gäminiň täzeden ýoluny dowam etdirmäge mümkinçilik bolmady.
Gämini dykylan ýerinden halas etmek we ony täzeden herekete getirmek üçin gämi tirkegleriniň sany 14-e ýetdi. 400 metr uzunlygyndaky gäminiň baş tarapynyň aşagynda gaýalygyň bardygy anyklandy. Şol gaýalyk gämini halas etmek işini kynlaşdyrýar.
Gämini halas etmek başartmasa, onda onuň ýüküniň azaldylmagy meýilleşdirilýär. Müsüriň Prezidenti Abdulfettah Sisi gäminiň ýüküniň düşürilmegi üçin taýýarlyk görmek barada tabşyryk berdi.
Kanalyň ýapyk galan her bir gününiň ýutgisi 14-15 million dollara barabardyr. Kanala gözegçilik edýän ýolbaşçylar gäminiň kenara gitmegine güýçli ýeliň täsir eden däldigini belläp, bu babatda seljermeleriň dowam edýändigini belledi.
Mälim bolşy ýaly, Sues kanalynyň gurluşygy Fransiýanyň maýa goýumlarynyň ýardamy bilen 1859-njy ýylda başlanýar. Kanal 1869-njy ýylyň 17-nji noýabrynda resmi taýdan ulanmaga berilýär. Uzak ýyllaryň dowamynda Sues kanalyndan gelýän girdejiler Müsüriň esasy girdejileri bolupdy. Gämi gatnawyndan, nebitden we syýahatçylykdan gelýän girdejiler Müsür ykdysadyýetiniň esasy sütünleri bolup durýar.