Ýaponiýanyň ozalky goranmak ministri Sigeru Isiba ýurdy dolandyrýan Liberal-demokratik partiýasynyň ýolbaşçysy wezipesine saýlandy. Ol 1-nji oktýabrda ýurduň nobatdaky Premýer-ministri bolar.
Golaýda, Liberal-demokratik partiýasynyň mejlisinde partiýanyň ýolbaşçysyny saýlamak boýunça ses berişlik gurnaldy. Şol ses berlişigiň ikinji tapgyrynda Sigeru Isiba bilen ykdysady howpsuzlyk ministri Sanae Takaita bäsleşdir. Partiýalylaryň 415-sinden 215 ses alan Sigeru Isiba partiýanyň täze ýolbaşçysy boldy.
67 ýaşyndaky Sigeru Isiba 5 gezek ýurduň dolandyryjy partiýasynyň ýolbaşçylygyna dalaşgär boldy. Ahyrynda sesleriň agramly bölegini alan Sigeru Isibanyň 1-nji oktýabrda ýapon parlamentiniň nobatdan daşary mejlisinde Premýer-ministr wezipesi tassyklanar.
Ýaponiýanyň täze premýeri ýokary derejeli syýasatçynyň maşgalasynda gelýär. Onuň kakasy içeri işler ministri, Tottori prefekturasynyň gubernatory wezipelerinde işledi.
Isiba Tokio şäherindäki abraýly Keýo uniwesitetinde hukuk okady. Ol zähmet ýoluna bank ulgamynda başlady, kakasy araadan çykandan soňra onuň ýoluny dowam etdirmek bilen syýasata goşuldy. 1986-njy ýylda parlamentiň düzümine saýlanyp, 29 ýaşynda Wekiller palatasynyň iň ýaş agzasy boldy.
Isiba saýlaw kampaniýasynda sebitleriň goldawy bilen ykdysady ösüşi gazanmagy wada berdi we Tokiodaky käbir ministrlikleri we hökümet edaralaryny sebitlere geçirmegi göz öňünde tutdy. Şeýle hem ol tebigy betbagtçylyklar bilen göreşmek üçin agentlik döretjekdigini aýtdy.