Malim bolşy ýaly, şu ýylyň 29-njy aprelinde ýurdumyzyň köpçülikleýin habar beriş serişdelerinde işleýän žurnalistleriň we bu ugurda bilim alýan talyp ýaşlaryň gatnaşmagynda şaşka boýunça gyzykly ýaryş geçirildi. Asylly däbe öwrülen bu aň-paýhas oýuny “Atavatan Türkmenistan” halkara žurnalynyň hem-de “Makul Hyzmat” Terjime Merkeziniň hemaýat bermeginde gurnalýar. Şeýle hem bu ýaryşyň guramaçylygyna Türkmenistanyň Sport we ýaşlar syýasaty ministrliginiň “Türkmenistan Sport” halkara žurnalynyň, Aşgabat şäheriniň sport we ýaşlar syýasaty Baş müdirliginiň Ýöriteleşdirilen Küşt-şaşka mekdebi hem işjeň gatnaşýar.
Bu ýaryş ýurdumyzyň metbugatynda hem uly orun aldy. Gündelik neşir edilýän “Türkmenistan” gazeti bilen bir hatarda “Biznes reklama” hem-de “Türkmen sporty” gazetlerinde bu ýaryş baradaky habarlar çap edildi. “Türkmen sporty” gazetinde “Žurnalistleriň arasyndaky bäsleşik” ady bilen çap edilen makalada bu ýaryşyň şweýsar usulynda geçirilip, onuň hem bäsleşigiň soňky tapgyryna çenli gatnaşyjylaryň baýrakly orunlara dalaş etmegine mümkinçilik berlendigi bellenip geçilýär.
“Biznes reklama” gazetinde çap edilen makalada bolsa, “Türkmenistan – Bitaraplygyň mekany” ýylynda
metbugat wekilleriniň arasynda şeýle ýaryşlaryň guralmagynyň ýurdumyzdaky syýasat we sport wagyzçylarynyň sportdaky başarnyklaryny ýüze çykarmaga mümkinçilik berýändigi, şol bir sanda sport arkaly dostlugyň berkidilýändigi bellenilip geçilipdir. Şeýle hem bu sport ýaryşynyň döwrüň sesi bolan žurnalistleriň ýurdumyzdaky gündelik sport wakalaryny beýan etmekde galam ýöredişlerini däl-de, eýsem, sportuň bu görnüşinde olaryň paýhaslarynyň üstünligini açyp görkezendigi mälim edilipdir.