Bu günki gün “Halkyň Arkadagly zamanasy” ýylynda ýurdumyzyň ylym-bilim ulgamyny has-da kämilleşdirmek we talyp ýaşlara berilýän bilimiň hilini has-da gowulandyrmak boýunça hem giň gerimli işler durmuşa geçirilýär.
Gahryman Arkadagymyz: “Güýçli döwletde ylym esasy orny eýeleýär. Diýmek, biz ylmyň iň täze gazananlary bilen aýakdaş gitmelidiris” diýip, bu ulgamy has-da ýokary derejeler bilen ösdürmek we onuň maddy-enjamlaýyn binýadyny has-da pugtalandyrmak boýunça taýsyz tagallalary edýär. Eziz Arkadagymyz ösüp gelýän ýaş nesliň ylymly, bilimli, giň dünýägaraýyşly, işine ussat, kämil hünärmenler, Watansöýüji ýaşlar bolup ýetişmekleri üçin atalyk aladalary edýär.
Diýarymyzda alnyp barylýan ylym, bilim özgertmeleriniň biri hem ýurdumyzyň ýokary okuw mekdepleriniň arasynda döredilen sanly bilim portalydyr. Häzirki wagtda sanly bilim ulgamyny ösdürmegiň Konsepsiýasyny üstünlikli durmuşa geçirmegiň ilkinji tapgyrynda sanly bilim ulgamynyň programma üpjünçiligi hem-de onuň binýadynda taýýarlanylan bu bilim portaly uly ähmiýete eýedir. Ýokary okuw mekdepleriň hünärmenleriniň, professor-mugallymlarynyň we talyp ýaşlarynyň gatnaşmagynda döredilen sanly bilim portaly talyp ýaşlaryň kämil bilim almaklaryna ýakyndan ýardam berýär. Ondan içgin peýdalanýan talyplar özleriniň nazary okuwlarynda alýan bilimlerini has-da çuňlaşdyrýarlar.
Häzirki wagtda ýokary işjeňlikde saklanylýan sanly bilim portaly elektron poçta, okuw kitaplary, okuw gollanmalary, nazary okuwlara degişli suratlar, wideo okuw ýazgylary we görkezme çykyşlary bilen doly üpjün edilendir.
Eziz Diýarymyzyň bilim ojaklaryna häzirki zaman kompýuter tehnologiýalarynyň, ýokary tizlikli internet ulgamynyň giňden ornaşdyrylmagy netijesinde sanly aragatnaşyk ulgamynyň üsti bilen umumy okuw sapaklary guralýar, online görnüşinde internet olimpiadalary geçirilýär.
Gahryman Arkadagymyzyň ýolbaşçylygynda bilim ulgamynda alnyp barylýan sanly özgertmeleriň ählisi ýaşlaryň kämil derejede bilim almaklaryna gönükdirilendir.
Ýaşlaryň döwrebap bilim almagy we kämil hünärmenler bolup ýetişmegi üçin taýsyz tagallalary edýän Gahryman Arkadagymyzyň jany sag, başy dik bolsun, il-ýurt bähbitli, döwlet ähmiýetli tutýan beýik tutumly işleri elmydama rowaçlyklara beslensin!
Gülçähra Nurmedowa,
S.A.Nyýazow adyndaky TOHU-nyň uly mugallymy.