Ozal hem habar berşimiz ýaly, ertir sagat 19:00-da Özbegistanyň paýtagty Daşkent şäherindäki “Bunýedkor” stadionynda AFK-nyň Çempionlar ligasynyň çäklerinde “Pahtakor” topary bilen “Ahal” topary duşuşar.
Özbek toparynyň internet sahypasyndaky habara görä, bu iki topar mundan ozal özara duşuyk geçirmedi. 2003-nji ýyldan bäri Özbegistanyň “Pahtakory” türkmen toparlary bilen duşuşyk geçirmändir. Şeýlelikde, 20 ýyldan soňra “Pahtakor” goňşy Türkmenistanyň topary bilen güýç synanyşar.
Türkmenistanyň kubogynyň we Naýbaşy kubogynyň eýesi bolan “Ahal” topary Çempionlar ligasyna ilkinji gezek gatnaşýar. Türkmen topary Türkmenistanyň futbol çempionatynda 14 duşuşykda 16 utuk jemläp, 6-njy orunda barýar.
Çempionlar ligasynda bolsa, “Al-Feýha” toparyny 1:0 hasabynda utdy, “Al-Aýn” toparyndan 4:2 hasabynda utuldy. Her iki duşuşykda toparyň kapitany Elman Tagaýew tapawutlandy.
Türkmen toparynyň düzüminde jerime alan futbolçy ýok.
Mundan ozal, “Pahtakor” toparynyň Türkmenistanyň futbol toparlary bilen duşuşyklaryna ser salanymyzda, özbek topary diňe bir Aziýa ýaryşlarynda däl, beýleki ýaryşlarda hem türkmen toparlary bilen oýnady.
Aziýanyň ýaryşlarynda 4 duşuşyk geçirildi. 1994-nji ýylda “Pahtakor” Gazagystanyň Jambul şäheirnde “Merw” toparyndan 4:0 hasabynda üstün çykypdy. 1998-nji ýylda “Nisa” topary bilen duşuşyp, ilkinji duşuşykda 5:0 hasabynda utulan, “Pahtakor” jogap duşuşykda 6:0 hasabynda utupdy.
2003-nji ýylda Çempionlar ligasynda “Nisa” toparyny 3:0 hasabynda utupdy.
“Pahtakor” topary Türkmenistanyň “Köpetdag” topary bilen SSSR-iň kubogynyň we Birinji ligasynyň, şeýle hem GDA-nyň Çempionlar kubogynyň ýaryşynda duşuşypdy.