Ozal hem habar berşimiz ýaly, şu gün Hazar deňziniň kenaryndaky “Awaza” milli syýahatçylyk zolagynda ilkinji gezek geçirilýän «Türkmenistan-Özbegistan-Azerbaýjan» üçtaraplaýyn duşuşygy boldy. Oňa türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow, Özbegistan Respublikasynyň Prezidenti Şawkat Mirziýoýew hem-de Azerbaýjan Respublikasynyň Prezidenti Ilham Aliýew gatnaşdy.
Ýokary derejedäki duşuşygyň jemleri boýunça ulag we logistika, gämi gurluşygy we raýat awiasiýasy pudagyndaky hyzmatdaşlyk etmek boýunça ähtnamalar, haryt biržalary we beýleki ugurlarda hyzmatdaşlyk şertnamalaryna gol çekildi.
Ýokary derejedäki duşuşyk tamamlanandan soňra medeni maksatnama geçildi. Şonuň çäklerinde «Galkynyş» milli at üstündäki oýunlar toparynyň görkezme çykyşlaryna orun berildi.
Bu dabaranyň çäklerinde Milli Liderimiz Gurbanguly Berdimuhamedow Türkmenistanyň Prezidentiniň hem-de türkmen halkynyň adyndan Özbegistan Respublikasynyň Prezidenti Şawkat Mirziýoýewe köşekli arwana düýe sowgat etdi.
Ozal hem habar berşimiz ýaly, Azerbaýjan Respublikasynyň Prezidenti Ilham Aliýewe “Tawus” atly ahalteke bedewini sowgat edilipdi.
Mälim bolşy ýaly, ahalteke bedewi, arwana düýesi, saryja goýny türkmen halkynyň milli gymmatlyklarydyr. Türkmen halky düýe malyny dünýä malyna deňeýär.