Türkmenistanyň “Migrasiýa gullugy hakynda” Kanunyna üýtgetmeler we goşmaçalar girizildi. 2009-nji ýylyň 21-nji noýabrynda kabul edilen “Migrasiýa gullugy hakynda” Türkmenistanyň Kanuny täze kabul edilen “Migrasiýa gullugy hakynda” Türkmenistanyň Kanunyna üýtgetmeler we goşmaçalar girizmek barada Kanun bilen täze mazmuna eýe boldy. Türkmenistan gazetiniň 2020-nji ýylyň 9-nji noýabryndaky sanynda neşir edilen we täze Kanununyň degişli maddasy bilen resmi çap edilen güni herekete giren täze Kanun bilen “Migrasiýa gullugy hakynda” Kanunynda birnäçe üýtgetmeler we goşmaçalar boldy.
“Atavatan Türkmenistan” halkara žurnalynyň www.atavatan-turkmenistan.com saýtynyň “Peýdaly Maslahat” sahypasyny yzygiderli yzarlaýan okyjylarymyzyň gyzyklanmalaryny hasaba alyp täze kabul edilen Kanunyň käbir üýtgetmelerini we goşmaçalaryny Size ýetirýäris.
Kanundaky Käbir üýtgetmeler we goşmaçalar:
Kanunyň 6-njy maddasy Migrasiýa gullugynyň esasy wezipelerini düzgünleşdirýär. Täze Kanun bilen “Migrasiýa gullugy hakynda” Türkmenistanyň Kanunynyň 6-nji maddasynyň 7-nji bendinde “işlemek” diýen sözi “zähmet işini amala aşyrmak” diýen sözlere çalşyrmaly diýip bellenen. Şeýle hem Kanunyň 6-nji maddasynyň 7-nji bendinde birnäçe goşmaçalar girizildi.
Kanunyň 6-nji maddasynyň 7-nji bendi täze üýtgetmeler bilen şeýle boldy:
7) ýurduň içerki zähmet bazaryny goramak, daşary ýurt raýatlaryna we raýatlygy bolmadyk adamlara Türkmenistanyň çäginde zähmet işini amala aşyrmak üçin rugsatnama bermek;
«7(1) daşary ýurt raýatlaryny we raýatlygy bolmadyk adamlary Türkmenistanyň çäginde bolýan ýa-da ýaşaýan ýeri boýunça hasaba almak hem-de olaryň hasabyny ýöretmek;
7(2) Türkmenistanyň çäginde zähmet işini amala aşyrýan Türkmenistanyň raýatlaryny bolýan ýeri boýunça bellige almak we olaryň hasabyny ýöretmek;
7(3) Türkmenistanyň raýatlaryny bolýan ýerleri boýunça bellige almak bilen bagly meseleler babatynda ygtyýarlandyrylan döwlet edaralary bilen arkalaşykly işlemek we bu meseleler boýunça umumy statistiki hasabatyň ýöredilmegini üpjün etmek;»;
Kanunyň Migrasiýa gullugynyň ýerine ýetirýän işleri bilen baglanşykly 11-nji maddasynda hem käbir üýtgetmeler girizildi. Ol üýtgetmeleriň biri hem 11-nji maddanyň 5(1)-nji bendindäki we şol maddanyň 8 bendindäki üýtgetmelerdir.
Kanunyň 11-nji maddasynyň üýtgän 5(1)-nji bendi şeýle :
5(1) zähmet işini amala aşyrmak maksady bilen, hemişelik ýaşaýan ýerinden ýazgydan çykmazdan kyrk bäş senenama gününden köp möhlete Türkmenistanyň çäginde başga ýere wagtlaýyn giden Türkmenistanyň raýatlaryny bolýan ýeri boýunça bellige alýar, bu barada degişli resminamany berýär hem-de şol raýatlaryň bellige alynmagy barada maglumatlar goruny döretmek arkaly olaryň hasabyny ýöredýär;»;
Kanunyň 11-nji maddasynyň üýtgän 8-nji bendi şeýle :
«8) öz ygtyýarlylygynyň çäginde barlaglary geçirmek arkaly gözegçiligi amala aşyrýar:
- a) daşary ýurt raýatlary, raýatlygy bolmadyk adamlar, wezipeli adamlar, ýuridik we fiziki şahslar, ýuridik şahslaryň şahamçalary we wekillikleri hem-de beýleki guramalary tarapyndan wizalary resmileşdirmegiň we bermegiň, Türkmenistana gelmegiň, Türkmenistanda bolmagyň, Türkmenistandan gitmegiň, şeýle hem Türkmenistanyň çäginden üstaşyr geçmegiň, bolýan ýeri boýunça hasaba almagyň tertibiniň, şol sanda daşary ýurt raýatlarynyň, raýatlygy bolmadyk adamlaryň Türkmenistanyň çäginde bolmagynyň esaslarynyň we möhletleriniň berjaý edilişine;
- b) Türkmenistanyň ýuridik we fiziki şahslary, ýuridik şahslaryň şahamçalary we wekillikleri hem-de beýleki guramalary tarapyndan daşary ýurt raýatlary, raýatlygy bolmadyk adamlar Türkmenistanda işe çekilende we olara zähmet işini amala aşyrmaga rugsatnamalar resmileşdirilende Türkmenistanyň raýatlarynyň boş iş orunlaryny eýelemäge artykmaç hukugy baradaky ýörelgäniň, şeýle hem iş berijide işleýän Türkmenistanyň raýatlarynyň we daşary ýurt raýatlarynyň sanynyň Türkmenistanyň kanunçylygynda bellenilen gatnaşygynyň berjaý edilmegine, daşary ýurt raýatlarynyň we raýatlygy bolmadyk adamlaryň Türkmenistanda zähmet işini amala aşyryşyna;
ç) daşary ýurt raýatlarynyň, raýatlygy bolmadyk adamlaryň Türkmenistanda bolmagy we Türkmenistanyň çäginden üstaşyr geçmegi üçin hasaba alyş ýygymynyň alnyşyna;
d) zähmet işini amala aşyrmak maksady bilen, hemişelik ýaşaýan ýerinden ýazgydan çykmazdan kyrk bäş senenama gününden köp möhlete başga ýere wagtlaýyn giden Türkmenistanyň raýatlaryny bolýan ýeri boýunça bellige almagyň tertibiniň berjaý edilişine;
e) daşary ýurt raýatlary, raýatlygy bolmadyk adamlar, ýuridik we fiziki şahslar, ýuridik şahslaryň şahamçalary we wekillikleri hem-de beýleki guramalary tarapyndan Türkmenistanyň çäginde migrasiýa babatda kanunçylygyň berjaý edilişine;»;
Internete birikmezden (offline ) habarlary okamak: Saýlamak mümkinçiligi
Applikasiýamyz offline işleýär we Siz internete birikmedik wagtyňyz hem Ata Watan habarlaryny okap bilersiňiz! Şeýle hem islän habaryňyz boýunça Size hususy bildiriş gelmegini sazlap bilersiňiz! Siz “sada görnüşi” saýlap WIFI ulgamyna birikmedik wagtyňyz mobil internetiňizi tygşytlap bilersiňiz! Ine biziň täze applikasiýamyzyň esasy aýratynlyklarynyň käbirleri!
Siz “Atavatan Türkmenistan” halkara žurnalynyň www.atavatan-turkmenistan.com saýtynyň täzelenen applikasiýasyny öz mobil telefonyňyza indirip almak isleseňiz şu ýere basyň! Applikasiýany ýüklemek üçin şeýle hem Google Play-dan “Atavatan Turkmenistan” ýazyp gözleg edip bilersiňiz! Aşakdaky suratyň üstüne basmak bilen Applikasiýany ýüklemek mümkin! Applikasiýamyzy indiriň we aşakda sanaýan aýratynlyklarymyzy halajakdyňyza ynanýarys!
