Argentinanyň milli ýygyndysynyň ýyldyzy Lionel Messi häzirki wagtda çykyş edýän Fransiýanyň “PSŽ” toparyna bir möwsümde 680-den 720 million ýewro aralygynda girdeji gazandyrdy.
Ispaniýanyň “Marca” sport neşiriniň bilermenleriniň maglumatyna görä, Lionel Messiniň ady bilen baglanyşykly taýýarlanan dürli söwgatlyk harytlaryndan, marketingden we dürli derejede geçirilen duşuşyklardan 700 million ýewro töweregi girdeji gazanyldy.
Birinjiden, Fransiýanyň “PSŽ” topary taryhynda ilkinji gezek bir futbolçynyň köýnekçesiniň 1 milliondan gowragyny satmagy başardy. Messiniň “PSŽ” toparyndaky köýnekçeleri 50 bilen 90 ýewro aralygynda satyldy.
Şeýle hem 35 ýaşyny dolduran Messi bilen şertnama baglaşmak topara azyndan 10 sany täze hemaýatkär şertnamalaryny baglaşmaga, toparyň jemgyýetçilik torlaryndaky abunaçylaryň sanyny 15 million adama çenli ýokarlandyrmaga mümkinçilik berdi.
Mälim bolşy ýaly, Messi 2021-nji ýylyň tomsunda fransuz toparyna geçipdi. Ol bu toparyň düzüminde 34 duşuşyk geçirip, 11 gezek tapawutlandy. Messiniň şertnamasy indiki ýylyň tomsunda dolýar.