Şu gün Türkmenistanda Saýlawlary we sala salyşlyklary geçirmek baradaky merkezi toparyň mejlisi geçirildi. Bu barada “Watan” habarlar gepleşiginde bellenilip geçildi.
Şol mejlisde ýurdumyzda 12-nji martda geçirilen Türkmenistanyň Prezidentiniň saýlawlarynyň netijeleri barada gürrüň edildi. Edilen çykyşlarda, Türkmenistanyň paýtagtynda we bäş welaýatynda ýurdumyzda hereket edýän kanunçylyga hem-de halkara hukugynyň kadalaryna berk laýyklykda geçen saýlaw möwsüminiň ýokary guramaçylyk derejesi bellenildi. Bu ýagdaýy ýerlerde saýlawlaryň barşyna gözegçiligi amala aşyran milli synçylar hem doly tassykladylar. Muňa Garaşsyz Döwletleriň Arkalaşygyndan, Şanhaý Hyzmatdaşlyk Guramasyndan, Yslam Hyzmatdaşlyk Guramasyndan, Türki Döwletleriň Guramasyndan we daşary ýurtlardan synçylaryň wekilliginiň agzalary göz ýetirdiler.
Ýurdumyz boýunça 2577 saýlaw uçastogynda hem-de Türkmenistanyň daşary ýurtlardaky ilçihanalarynyň we konsullyk gulluklarynyň ýanynda döredilen 41 saýlaw uçastogynda sesleriň berlendigi mälim edildi.
Saýlaw möwsüminiň ähli tapgyrlaryny şöhlelendiren köpçülikleýin habar beriş serişdeleriniň wekillerine aýratyn hoşallyk sözleri aýdyldy.
Şeýlelikde, Türkmenistanyň Prezidentiniň ählihalk saýlawlary guramaçylykly geçirildi. Ses bermegiň gutarnykly netijeleri ýakyn wagtda yglan ediler.
Merkezi saýlaw toparynyň başlygy ýygnananlara bu ähmiýetli jemgyýetçilik-syýasy çärä taýýarlyk görmekde we ony guramaçylykly geçirmekde tagalla eden hemmelere hoşallygyny bildirdi.