Şu ýylyň 22-nji aprelinde “Merkezi Aziýa+Russiýa Federasiýasy” daşary işler ministrleriniň 5-nji duşuşygy sanly ulgam arkaly geçiriler. Bu barada Türkmenistanyň Daşary işler ministrligi habar berýär.
Bu barada Russiýa Federasiýasynyň Daşary işler ministrliginiň hem beren beýanatynda Russiýanyň, Gazagystanyň, Gyrgyz Respublikasynyň, Täjigistanyň, Türkmenistanyň we Özbegistanyň daşary işler ministrleriniň gatnaşmagyna garaşylýar.
Daşary syýasat edaralarynyň ýolbaşçylar Merkezi Aziýa sebitindäki durnuklylygy üpjün etmek bilen baglanyşykly meselelere serederler. Şeýle hem Owganystan bilen baglanyşykly ýagdaýlara baha berler.
Şeýle hem ulag, energetika, sanitar-epidemiologiýa abadançylygy ýaly ugurlarda hyzmatdaşlyk gatnaşyklaryny ýola goýmak meseleleri boýunça pikir alşarlar.
2021-nji ýylyň 16-njy iýulynda Daşkent şäherinde “Merkezi Aziýa+Russiýa Federasiýasy” daşary işler ministrleriniň 4-nji duşuşygy geçirilipdi.