Klaudiýa Şeýnbaum Meksikanyň saýlanan Prezidenti hökmünde wezipe ygtyýarlylyklaryna girişdi. Ol Meksikanyň 66-njy Prezidenti boldy. 62 ýaşyndaky Şeýnbaum bu wezipede 6 ýyl bolar we ol Meksikanyň taryhyndaky ilkinji zenan Prezident.
2018-2023-nji ýyllarda Klaudiýa Şeýnbaum Mehiko şäheriniň häkimi bolup işledi. Ol inžener-tehniki ylymlarynyň doktory, 100-den gowrak ylmy we syýasy-jemgyýetçilik işleriniň hem-de 2 kitabyň awtorydyr. Onuň eserleri we ylmy işleri energetika, daşky gurşaw we durnukly ösüş ugurlaryna gönükdirilendir.
Şeýnbaum ýurduň ozalky Prezidenti Andres Manuel Lopes Obradoryň “dördünji transformasiýa” adyny alan syýasat ugruny dowam etdirer.
Zenan Prezident özüniň saýlawdan öňki çykyşlarynda bilimiň ähli derejelerindäki talyplara goldaw bermek, gender deňligi giňeltmek, Meksikanyň medeni beýikligini ýokarlandyrmak we taryhy ýadygärliklerini dikeltmek, döwletiň azyk, energetika we ýangyç garaşsyzlygyny üpjün etmek, dünýä döwletleri bilen hoşniýetli gatnaşyklary dowam etdirmek ýaly başlangyçlary öňe sürüpdi.