2025-nji ýylyň 4-8-nji awgustynda geçiriljek Deňze çykalgasy bolmadyk ösüp barýan döwletler boýunça üçünji BMG-niň maslahatyna gatnaşmak üçin Malawi Respublikasynyň ýokary derejeli wekiliýetiniň aýratyn toparlary Türkmenbaşy şäherine gelip başlady. Mundan ozalky günlerde wekiliýetiň ilkinji toparlary garşy alnypdy. Şu gün, 3-nji awgustda bolsa, wekiliýete ýolbaşçylyk edýän Malawi Respublikasynyň Wise-prezidenti jenap Maýkl Bizwik Usiniň gelmegine garaşylýar.
Türkmenbaşy Halkara howa menziline gelip gonan wekiliýetiň agzalary türkmen myhmansöýerliginiň asylly däplerine laýyklykda mähirli garşylanyldy. Ýurduň Wise-prezidentiniň ýolbaşçylygyndaky toparyň hem ýakyn sagatlarda gelmegi meýilleşdirilýär.
Malawiniň bu möhüm halkara foruma ýokary derejede gatnaşmagy maslahatyň gün tertibindäki meselelere ýurduň uly ähmiýet berýändigini görkezýär. Bu wekiliýetiň işjeň gatnaşmagy ösüp barýan döwletleriň bähbitlerini ilerletmäge we özara bähbitli hyzmatdaşlygy pugtalandyrmaga uly goşant goşar.