Ispaniýanyň dünýä belli “Barselona” toparynyň argentinaly hüjümçisi, 6 gezek “Altyn top” baýragynyň eýesi Lionel Messi bu topardan gitjekdigini mälim etdi. Bu barada dünýäniň ähli sport neşirleri yzygiderli habarlar çap edýärler.
Messiniň “Barselona” toparynyň ýolbaşçylaryna topardan gitjekdigi barada hat bilen ýüzlenendigi mälim edilýär. Topar hem resmi habarnama alandygyny tassyklady. Messiniň ýetişen toparyndan gitmeginiň esasy sebäpleriniň biri “Bawariýa” toparyndan 8:2 hasabynda utulmagy bolup durýar.
Messiniň topar bilen baglaşan şertnamasynda görkezilen her möwsümiň ahyryndaky birtaraplaýyn esasda şertnamany ýatyrmak bendinden peýdalanyp, topardan gitmegi göz öňünde tutýandygy bellenilip geçildi. “Barselona” topary bolsa öz gezeginde şertnamadaky bu bendi üstümizdäki ýylda amala etmegiň mümkin däldigini we onuň möhletiniň 10-njy iýunda tamamlanandygyny belleýär.
Ýöne Messi koronawirus ýokanjy sebäpli möwsümiň golaýda tamamlanandygyny öňe sürýär. Şeýle hem ol dünýäde emele gelen ýagdaýlar sebäpli şertnamadaky bu bendi üýtgedip boljakdygyny belleýär.
Soňky maglumatlara görä, “Barselona” topary gysga wagtda direktorlar geňeşiniň ýygnagyny geçirer.
Mälim bolşy ýaly, “Barselonanyň” “Bawariýa” toparyndan 8:2 hasabynda utulmagy toparda köp sanly üýtgeşikleriň geçirilmegine sebäp boldy. Toparyň tälimçisi çalşyldy. Ronald Kuman tälimçi wezipesine bellendi. Topardaky futbolçylaryň aglabasyny başga toparlara ibermek göz öňünde tutulýar.
Messi bilen tälimçi Ronald Kumanyň hem gepleşikler geçirendigi we şol gepleşiklerde Kumanyň hiç bir futbolça ýeňillik döredilmejekdigi baradaky çykyşynyň Messiniň bu topardan gitmegine täsirini ýetirendigi aýdylýar.
Messi bilen Angliýanyň “Mançester Siti” we “Mançester Ýunaýted” toparylary bilen bir hatarda Fransiýanyň “PSŽ” hem-de Italiýanyň “Inter” toparlary gyzyklanýar.
Messiniň ozalky tälimçisi, häzir Angliýanyň “Mançester Siti” toparyna tälim berýän Hosep Gwardiola bilen telefonda söhbetdeş bolup, onuň toparynda çykyş etmegi isleýändigi mälim edilýär.
Bütin professional karýerasyny “Barselonada” geçiren 33 ýaşly Lionel Messi bu toparyň düzüminde 630 gowrak pökgi geçirdi. Argentinaly hüjümçi “Barselona” bilen 10 gezek liganyň çempiony we 4 gezek Çempionlar ligasynyň çempiony boldy.
2017-nji ýylda “Barselona” bilen şertnamasyny täzelän Messiniň şertnamasynyň möhleti 2021-nji ýylyň 30-njy iýunyna çenlidir.
“Barselonanyň” ýaşlar toparynda önüp-ösen we bu toparda 20 ýyldan bäri futbol oýnaýan Messi 2004-nji ýyldan bäri toparynyň uly ýaşdaky futbolçylarynyň hataryndan çykyş edip gelýär.