Türkmenistanyň kuraş boýunça milli ýygyndy toparynyň türgenleri Arkadag şäherindäki jemleýji okuw-türgenleşik ýygnanyşyklaryny tamamlap, paýtagtymyzyň Olimpiýa şäherçesindäki «Türgenler» myhmanhanasyna ýerleşdiler.
Myhmanhanada ýakyn günlerde badalga beriljek Kuraş boýunça dünýä çempionatynda Watanymyzyň abraýyny gorajak pälwanlarymyz we olaryň tälimçileri milli däp-dessurlarymyza laýyklykda, duz-çörek bilen garşy alyndy. Ýörite akkreditasiýa şahadatnamalaryny alan türgenlerimiz döwrebap myhmanhanada özleri üçin ähli şert-mümkinçilikler döredilen otaglarda ýerleşdiler.
Dünýä çempionatynda ýurdumyzyň sport abraýyny goramak üçin erjel pälwanlaryň 15-si saýlanyp alyndy.
Türkmenistanyň at gazanan tälimçisi Dörtguly Tejenowyň halypalygynda türgenleşýän erkekler milli ýygyndymyzyň düzümine Wepa Awliýakulyýew, Döwlet Hamrakulyýew, Şatlyk Jumanyýazow, Daýanç Omirow, Sanjar Abdyrahmanow, Ruslan Esgerow hem-de Sapa Sapaýew girdi.
Zenanlar ýygyndymyzyň düzüminde Aýşirin Haýdarowa, Aýnur Amanowa, Gülşat Annaýewa, Dinara Rozykulowa, Mariýa Lohowa, Sabina Kadyrowa, Jahan Muhammedowa hem-de Sabina Agajanowa halkara derejeli sport ussady Şirin Kubaýewanyň tälimçiliginde ýaryşa taýýarlandy.