Türkmenistan döwletimize Birleşen Milletler Guramasynyň Nýu-Ýork şäherindäki ştab-kwartirasyndan hoş habar gelip gowuşdy. 7-nji iýunda Türkmenistan 7-nji gezek BMG-niň Baş Assambleýasynyň wise-başlyklygyna saýlandy.
Türkmenistanyň Daşary işler ministrliginiň berýän habaryna görä, Türkmenistan şu ýyl geçiriljek BMG-niň Baş Assambleýasynyň 77-nji mejlisiniň başlygynyň orunbasarlygyna saýlandy.
Şeýlelikde, Türkmenistan bu abraýly guramanyň wise-başlyklygyna 7-nji gezek saýlanýar. Ozal Türkmenistan döwletimiz BMG-niň Baş Assambleýasynyň 58-nji, 62-nji, 64-nji, 68-nji, 71-nji we 75-nji mejlislerine wise-başlyklyga saýlanypdy.
Birnäçe minut öň habar berşimiz ýaly, Birleşen Milletler Guramasynyň Baş Assambleýasynyň 77-nji mejlisiniň başlygy wezipesine wengriýaly diplomat Çaba Kereşi saýlandy. Ol bu wezipede maldiwli Abdulla Şahidiň ornuna geçer.
BMG-niň Baş Assambleýasynyň 77-nji melisi 13-nji sentýabrda öz işine başlaýar. Ýokary derejedäki duşuşyklar bolsa, 20-nji sentýabrda badalga alýar.
Baş Assambleýa BMG-niň ýeke-täk uniwersal edarasy bolup, 193 döwlet onuň agzasydyr.