Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurdumyzyň taryhy mekanynda binýat bolan Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça Haýyr-sahawat gaznasynyň Müdiriýetiniň birinji mejlisini geçirdi.
Birinji mejlise Gurbanguly Berdimuhamedow adyndaky Howandarlyga mätäç çagalara hemaýat bermek boýunça Haýyr-sahawat gaznasynyň wise-prezidenti R.Bazarow, Gaznanyň hasapçysy Ý.Çernowa, Gaznanyň prezidentiniň kömekçisi Ý.Orazow, Gaznanyň Iş dolandyryjysy K.Babaýew, onuň hukukçysy M.Hojamberdiýewa, şeýle hem Gaznanyň media-habarlar wekili A.Jepbarow, Gurbanguly Berdimuhamedow adyndaky Çagalar sagaldyş-dikeldiş merkeziniň direktory M.Öküzowa hem-de Arkadag şäheriniň häkimi Ş.Durdylyýew gatnaşdylar.
Mejlisiň gün tertibine Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň geçen döwürde alyp baran işleri, şeýle hem Gaznanyň öz işine başlamagy, onuň işiniň guralyşy hem-de işleriň alnyp barylyşy hakyndaky we beýleki meseleler girizildi.