Ertir, ýagny 3-nji noýabrda Gazagystanyň paýtagty Astana şäherinde Türki Döwletleriň Guramasynyň 10-njy sammiti geçiriler. Oňa gurama agza hem-de synçy döwletleriň döwlet we hökümet Baştutanlarynyň gatnaşmagyna garaşylýar.
Guramanyň düzüminde synçy bolup duran Wengriýanyň Premýer-ministri Wiktor Orban Gazagystana bardy we ikitaraplaýyn duşuşyklar geçirdi.
Özbegistanyň Prezidenti Şawkat Mirziýoýew, Gyrgyz Respublikasynyň Prezidenti Sadyr Žaparow hem-de Türkiýe Respublikasynyň Prezidenti Rejep Taýyp Ärdoganyň bu sammite gatnaşjakdygy mälim edildi.
Sammitiň gün tertibinde guramanyň çäginde, esasanam söwda, ykdysady, maýa goýumlary, ulag we aragatnaşyk, daşky gurşaw, medeni, ynsanperwer we beýleki ugurlarda köptaraplaýyn hyzmatdaşlygy mundan beýläk-de ösdürmek meseleleri bar.
Wekiliýetleriň ýolbaşçylary halkara syýasatynyň we sebitara gatnaşyklaryň häzirki meseleleri barada pikir alyşarlar.
Sammitiň netijeleri boýunça birnäçe bilelikdäki resminamalary kabul etmek meýilleşdirilýär.
Türki Döwletleriň Guramasyna başlyklyk edýän Özbegistan Respublikasynyň gurnamagynda şu ýylyň dowamynda 100-den gowrak dürli derejedäki çäreler gurnalyp, olarda köptaraplaýyn hyzmatdaşlygy mundan beýläk-de ösdürmegiň ugurlary maslahatlaşyldy.
Türki Döwletleriň Guramasy agza döwletler – Özbegistan, Azerbaýjan, Gazagystan, Gyrgyzystan we Türkiýe. Wengriýa we Türkmenistan guramanyň synçy agzalarydyr.