Hytavda saparda bolan Gazagystanyň Prezidenti Kasym-Žomart Tokaýew 8-nji gazak-hytaý işewürler geňeşiniň mejlisine gatnaşdy. Onuň jemleri boýunça Gazagystan bilen Hytaý 15 milliard dollarlyk täjirçilik ylalaşyklaryna gol çekdiler.
Bellenilişine görä, ýüzden gowrak gazak we hytaý kompaniýalary bu geňeşiň mejlisiniň netijeleri boýunça 70-den gowrak täjirçilik resminamasyna gol çekdiler.
Ylalaşyklara energiýa, sanlylaşdyrma, gurluşyk, metallurgiýa, telekommunikasiýa, ulag we logistika ýaly ugurlar girýär.
“Bu örän gowy görkezijidir. Munuň diňe artjakdygyna ynanýaryn. Gazagystanda dünýä derejesindäki CNPC, CITIC, SINOPEC, HUAWEI ýaly iri korporasiýalary hem öz içine alýan hytaý maýasy bilen 6 müňden gowrak kärhana üstünlikli işleýär. Diňe iri däl, orta telekeçilik hem giňden wekilçilik edýär” diýip, Gazagystanyň Prezidenti Kasym-Žomart Tokaýew geňeşiň mejlisinde çykyşynda belledi.
Tokaýew şeýle hem Hytaýyň eýýäm Gazagystanyň ykdysadyýetine 27 milliard dollar maýa goýandygyny nygtady.
Ol şeýle hem maliýe pudagynda gazak-hytaý işewür gatnaşyklaryny berkitmäge çagyrdy.