Gazagystan bilen Eýran ikitaraplaýyn söwdanyň möçberini 3 milliard dollara ýetirmek babatda hereketleriň meýilnamasyna gol çekişdi.
Bu resminama Gazagystanyň Premýer-ministriniň orunbasry Serik Žumangarin bilen Eýranyň oba hojalyk ministri Mohammad Ali Nikbahtyň arasynda gol çekildi.
Eýranyň paýtagty Tähranda söwda-ykdysady, ylmy-tehniki we medeni hyzmatdaşlyk boýunça hökümetara toparynyň 19-njy mejlisi geçirildi. Şol mejlisde iki ýurduň arasyndaky söwdanyň möçberini artdyrmak babatda ylalaşyldy. Bu görkezijini 3 milliard dollara çenli ýetirmek göz öňünde tutulyp, söwda çäklendirmeleri aradan aýyrmak, täzeçil usullary girizmek babatda pikir alşyldy.
Gazak önüm öndürijiler Eýranyň sarp edijilerine 75 haryt ugry boýunça umumy bahasy 250 million dollara barabar eksport etmäge taýýardygyny mälim etdiler.
Eýranyň oba hojalyk ministri Mohammad Ali Nikbaht öz ýurdunyň kärhanalary Gazagystana balyk we süýt önümleri, ary baly, miwe we bakja önümleri, gury ir-iýmişleri we beýleki azyk önümlerini eksport etmek mümkinçiligine seretmäge taýýardygyny belläp geçdi.