Geljek ýylyň tomsunda ilkinji gezek 32 klubuň gatnaşmagynda geçiriljek FIFA Klublar Dünýä Kubogynyň toparçalarynyň bijeleri çekildi. ABŞ-nyň Maýami şäherinde geçirilen bije çekilişe FIFA-nyň ýolbaşçy düzümi, çykyş etjek klublaryň ýolbaşçylary, ozalky zenandyr erkek ýyldyz futbolçylar gatnaşdylar. Bijä laýyklykda, 32 klub 4 topardan 8 toparça paýlandy.
Ýaryşa Ýewropadan 12, Günorta Amerikada 6, Aziýadan 4, Demirgazyk Amerikadan 4, Afrikadan 4, Okeaniýadan 1 hem-de ýer eýesi hökmünde-de 1 klub gatnaşýar.
Bijä laýyklykda, çempionlygyň dalaşgärlerinden “Real Madrid” “H” toparça düşdi. Ispan kluby “Al Hilal”, “Paçuka” hem-de “Red Bull Salsburg” klublary bilen bije çekişdi. Başga bir faworit “Mançester Siti” topary “G” toparçada “Widad”, “Al Ain” hem-de “Ýuwentus” klublary bilen özara güýç synanyşar.
Her toparçada 1-2-nji ýeri alanlar 1/8 finala çykar. Adaty Dünýä Kubogynda bolşy ýaly, 1/8 finalda “A” toparçanyň birinjisi, “B” toparçanyň ikinjisi, “A” toparçanyň ikinjisi, “B” toparçanyň birinjisi bilen duşuşyk geçirer.
Çempionatyň açylyş duşuşygynda “A” toparçada ýer eýesi “Inter Maýami” bilen Müsüriň “Al Ahli” toparlary duşuşarlar.
Ýaryş geljek ýylyň 15-nji iýunyndan 13-nji iýulyna çenli aralykda ABŞ-nyň 11 şäherinde geçiriler. Duşuşyklar şol 12 stadionda oýnalar.
“A”: Palmeiras (Braziliýa), Porto (Portugaliýa), Al Ahli (Müsür), Inter Maýami (ABŞ)
“B”: PSŽ (Fransiýa), Atletiko Madrid (Ispaniýa), Botafogo (Braziliýa), Seattl Saunders (ABŞ
“C”: Bawariýa (Germaniýa), Oklend Siti (Täze Zelandiýa), Boko Huniors (Argentina), Benfika (Portugaliýa)
“D”: Flamengo (Braziliýa), Esperans de Tunis (Tunis), Çelsi (Angliýa), Leon (Meksika)
“E”: Riwer Pleýt (Argentina), Urawa Red Daýmonds (Ýaponiýa), Monterreý (Meksika), Inter (Italiýa)
“F”: Fluminense (Braziliýa), Borussiýa Dortmund (Germaniýa), Ulsan HD (Günorta Koreýa), Mamelodi Sandawns (Günorta Afrika)
“G”: Mançester Siti (Angliýa), Widad (Marokko), Al Ain (BAE), Ýuwentus (Italiýa)
“H”: Real Madrid (Ispaniýa), Al Hilal (Saud Arabystany), Paçuka (Meksika), Red Bull Salsburg (Awstriýa)