2025-nji ýylyň 4-nji awgustynda Deňze çykalgasy bolmadyk ösüp barýan döwletler boýunça geçiriljek üçünji BMG-niň maslahatyna gatnaşmak maksady bilen Ermenistan Respublikasynyň Prezidenti Waagn Haçaturýan Türkmenbaşy şäherine geldi.
Belent mertebeli myhmanyň uçary Türkmenbaşy Halkara howa menziline gondy. Bu ýerde Ermenistanyň Prezidenti ýokary derejede, türkmen myhmansöýerliginiň asylly däplerine laýyklykda dabaraly ýagdaýda garşylandy.
Deňze çykalgasy bolmadyk ýurt bolan Ermenistanyň bu foruma Prezident derejesinde gatnaşmagy aýratyn ähmiýete eýedir. Bu gatnaşyk maslahatyň gün tertibindäki ulag-üstaşyr geçelgeleriniň we söwda-ykdysady hyzmatdaşlygyň ösdürilmegi ýaly möhüm meseleleriň ara alnyp maslahatlaşylmagyna uly goşant goşar we iki dostlukly ýurduň arasyndaky gatnaşyklaryň has-da pugtalandyrylmagyna ýardam berer.
***
2025-nji ýylyň 4-nji awgustynda Deňze çykalgasy bolmadyk ösüp barýan döwletler boýunça geçiriljek üçünji BMG-niň maslahatyna gatnaşmak maksady bilen Nepal Federatiw Demokratik Respublikasynyň Premýer-ministri Khadga Prasad Şarma Oliniň ýolbaşçylygyndaky wekiliýet Türkmenbaşy şäherine geldi.
Belent mertebeli myhmany alyp gelen uçar Türkmenbaşy Halkara howa menziline gondy. Bu ýerde Nepalyň Premýer-ministri we onuň ýanyndaky wekiliýet türkmen myhmansöýerliginiň iň gowy däplerine laýyklykda dabaraly ýagdaýda garşylandy.
Deňze çykalgasy bolmadyk ýurt hökmünde Nepalyň bu foruma hökümet baştutany derejesinde gatnaşmagy aýratyn ähmiýete eýedir. Bu gatnaşyk maslahatyň ähmiýetini has-da artdyryp, ulag-üstaşyr geçelgeleri, söwda we durnukly ösüş ýaly möhüm meseleleriň ara alnyp maslahatlaşylmagyna uly goşant goşar.