Zenana mahsus bolan ýokardaky häsiýetleriň aýratynlyklary bilen bir hatarda, olaryň maşgala ojagyna bolan yhlasy hem ata-babalarymyzdan dowam bolup gelýär. Bu babatda Gahryman Arkadagymyz «Enä tagzym — mukaddeslige tagzym» atly eserinde: «Men, köplenç, mährem käbämiň durmuş ýoly hakynda pikir edýärin. Käbämiň dürli döwürde düşen suratlaryny deňeşdirip görýärin. Olardaky tapawutlary ýyllar bilen däl-de, maşgala ojagyna siňdirilen yhlas bilen ölçemäge çalyşýaryn» diýip belleýär.
Hormatly Prezidentimiziň alyp barýan döwlet syýasaty asyrlarboýy dowam edip gelýän türkmeniň maşgala däplerini dikeltmeklige, ony nesillerden-nesillere geçirmeklige gönükdirilendir. Bu Arkadagly Serdarymyzyň öňe sürýän her bir ýörelgesinde, başlangyçlarynda, tekliplerinde giňden beýan edilýär. Dogrudan-da, maşgalanyň berkligini isleýän adam, ilki onuň agzybirligini, asudalygyny goramak bilen, döwletli ojagyny, öý eýesini hormatlaýar.
Zenanlarymyza mahsus bolan nusgalyk häsiýetler türkmen maşgalasynyň esasyny düzýän ahlak gymmatlyklardyr. Ýyllaryň dowamynda kemala gelen bu gymmatlyklar bilen bir hatarda türkmeniň edim-gylymy, däp-dessury, ene topraga, türkmen diline, medeniýetine bolan uly söýgüsi, zähmetsöýerligi, ýagşylyk, hoşniýetli goňşuçylyk ýaly däp-dessurlary asyrlar aşyp, şu günlerimize gelip ýetdi.
Sähragül Begliýewa, Gökdepe etrabynyň
3-nji orta mekdebiniň mugallymy.