BILIM

Türkmenistan bilen Tatarystan bilim ulgamynda hyzmatdaşlygyny berkidýär

Tatarystanyň paýtagty Kazanda Türkmenistanyň Oguz han adyndaky Inžener-tehnologiýalar uniwersitetiniň rektory G.A.Mezilow bilen Kazan Milli barlag tehnologiýa uniwersitetiniň rektory Yu.M Kazakowyň arasynda duşuşyk geçirildi. Duşuşyga Türkmenistanyň Kazandaky Baş konsuly G.A.Garaýew hem gatnaşdy.

Duşuşykda taraplar bilim we ylym pudagynda ikitaraplaýyn hyzmatdaşlygy ýola goýmak meselelerini ara alyp maslahatlaşdylar. Rektorlar ýolbaşçylyk edýän ýokary bilim edaralary barada maglumat berdiler.

Türkmen tarapy biotehnologiýa, nanotehnologiýa, nanobiotehnologiýa, himiýa tehnologiýasy, nebit we gaz tehnologiýasy we ş.m. ugurlarynda hyzmatdaşlygy ösdürmäge bar bolan gyzyklanmany beýan etdi.

Taraplar iki uniwersitetde, şeýle hem Aşgabat we Kazan şäherlerinde geçirilen dürli halkara ylmy we barlag çärelerine işjeň gatnaşmaga taýýardyklaryny mälim etdiler.

Şunuň bilen baglylykda, türkmen tarapy Kazanyň ýokary okuw mekdebiniň professor mugallymlaryny şu ýylyň mart aýynda meýilleşdirilýän biotehnologiýa boýunça halkara maslahatda çykyş etmek üçin çagyrdy.

Duşuşygyň çäklerinde taraplar gazanylan şertnamalaryň ýerine ýetirilişi barada pikri alşyp, ikitaraplaýyn ähtnama baglaşmagyň mümkinçiligine-de garadylar.

Kazan Milli barlag tehnologiýa uniwersitetinde 20 müňden gowrak talyp bilim alýar we olaryň 10 göterimini daşary ýurtly talyplar düzýär. Bu uniwersitetiň daşary ýurtly talyplarynyň arasynda türkmen talyplarynyň paýy 74% -dir diýip, Kazan şäherindäki ýokary okuw mekdebiniň ýolbaşçysy belledi.

Ýene-de okaň

ABŞ-nyň Türkmenistandaky Ilçihanasy kitap sergisini gurnaýar

Türkmen okuwçylary halkara himiýa olimpiadasynda 3 medal gazandy

Halkara senagatçylar we telekeçiler uniwersitetine 500 talyp kabul ediler

Türkmenistanda 2025-2026-njy okuw ýylynda 16 müň 782 talyp okuwa kabul ediler

Türkmenistanda Hytaýyň Lu Ban ussahanasynyň işi ýola goýlar

Türkmen talyplary Özbegistanda tejribelik geçýärler