12-nji iýulda badalga alan Russiýa Federasiýasyndan Mongoliýa Respublikasyna uzaýan «Ýüpek ýoly – 2025» rallisine gatnaşýan Türkmenistanyň toparlary ynamly öňde barýarlar. 4 tapgyrynyň netijesinden soňra T2 kategoriýasynda bäsleşýän Türkmenistanyň türgenleri öňdeligi eýeleýärler.
4811,58 kilometrlik menzile uzap gidýän halkara ýaryşynda Türkmenistandan gatnaşýan türgenler ynamly çykyş edýärler. 4 tapgyrdan soňra T2 kategoriýasynda Maksatmyrat Daňatarow öňde barýar. Ol ikinji orundaky Merdan Toýlyýewden 0.5 sagat, üçünji orundaky Meýlis Abdullaýewden bolsa, 1.5 sagat öňe saýlandy.
Bu kategoriýada 4 tapgyrdan bäri türkmen türgenleriniň arasynda çekeşelikli bäsleşik dowam edýär.
Bu halkara ýaryşa jemi 15 döwletden 101 ekipaž gatnaşyp, olar T1, T2 , T3, T5, moto-kwadrasikelleriň toparlaryndan ybaratdyr.
Halkara ralli ýaryşynyň ilkinji tapgyryna 12-nji iýulda badalga berildi. Bu ýaryş 15-nji gezek geçirilip, ilkinji gezek ol 2009-njy ýylda geçirilipdi. Şonda halkara ýaryş Russiýa we Merkezi Aziýa döwletlerinden geçipdi.
Ralli ýaryşy 22-nji iýulda tamamlanar.