Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Pekindäki Halk ýygnaklar öýünde geçirilýän «Bir guşak, bir ýol» III ýokary derejeli maslahatynyň açylyş dabarasyna gatnaşýar.
Bu giň gerimli maslahata 140-dan gowrak ýurtdan hem-de 30 sany halkara guramalaryndan wekiller, şol sanda döwlet baştutanlary we halkara guramalarynyň ýolbaşçylary gatnaşýarlar.
Hytaý Halk Respublikasynyň Başlygy Si Szinpin ýokary derejeli forumda eden çykyşynda soňky 10 ýylda «Bir guşak, bir ýol» başlangyjynyň köp sanly hakyky, şeýle hem simwoliki taslamalaryň durmuşa geçirilmegi üçin esas bolup hyzmat edendigini aýtdy.
– Soňky 10 ýylda biz öňde goýlan wezipeleri ýerine ýetirmek üçin hemişe tagalla etdik. “Guşaklar we ýollar” başlangyjy hakyky taslamalary durmuşa geçirmäge esas döretdi – diýip, Si Szinpin «Bir guşak, bir ýol» III ýokary derejeli maslahatynyň açylyş dabarasynda eden çykyşynda belläp geçdi.
140 döwletden 4 müňden gowrak wekiliýetiň gatnaşmagynda geçirilýän «Bir guşak, bir ýol» III ýokary derejeli maslahatynyň açylyş dabarasynda eden çykyşynda Si Szinpin 2024-2028-nji ýyllarda Hytaýyň eksport we import harytlarynyň möçberi 32 trillion dollara, söwda hyzmatlarynyň möçberi 5 trillion dollara barabar bolajkdygyny belledi.
Si Szinpin Hytaýyň döwlet banklarynyň – “China Development Bank” hem-de “Export-Import Bank of China” maliýe edaralarynyň her biriniň «Bir guşak, bir ýol» başlangyjy esasynda durmuşa geçirilýän taslamalara 350 milliard ýuan (takmynan 47,6 mlrd dollar) möçberinde maliýe serişdelerini gönükdirjekdigini belledi.
Ýagny, “China Development Bank” hem-de “Export-Import Bank of China” 350 milliard ýuan möçberinde maliýeleşdirmegiň çeşmelerini gönükdirer.
Şeýle hem Si Szinpin Ýüpek ýoly gaznasyna goşmaça 80 milliard ýuan (takmynan 10.9 milliard dollar) möçberinde maýa goýumlary gönükdirmegi meýilleşdirýändiklerini belledi.
Ol bu maliýe serişdeleriniň hem «Bir guşak, bir ýol» başlangyjy esasynda durmuşa geçirilýän taslamalara gönükdiriljekdigini aýtdy.
Ýüpek ýoly gazanasy 2014-nji ýylyň 29-njy dekabrynda döredildi. Bu gazna «Bir guşak, bir ýol» başlangyjy esasynda infrastruktura taslamalaryna goldaw bermek hem-de söwda hyzmatdaşlygy ýeňilleşdirmäge ýardam etmek maksady bilen döredildi.