Paýtagtymyzdaky «Aşgabat» myhmanhanasynda ýurdumyzda geçirilýän «Gorkut ata» atly halkara kinofestiwalyň çäklerinde TÜRKSOÝ-na agza ýurtlaryň kinematograflarynyň duşuşygy geçirildi. Olar soňky bir ýylyň dowamynda eden işleri, geljekde ýerine ýetirilmeli taslamalar, edilmeli işler dogrusynda pikir alyşdylar.
Bu festiwalda türki dünýäniň dürli döwletlerine degişli hem-ä dokumental, hem-de doly göwrümli çeper filmler bäsleşýär. «Kinofestiwalyň ähmiýeti nämede?» diýen sowalyň ýüze çykmagy tebigy ýagdaýdyr. «Gorkut ata» kinofestiwaly, ilki bilen, türki dünýäniň kinematograflarynyň, kino sungatynyň ussatlarynyň bir ýere jemlenmegini üpjün edýändigi üçin aýratyn ähmiýete eýe.
Üstesine-de, prodýuserler bilelikdäki taslamalary işläp taýýarlamaga mümkinçilik alýarlar. Olar ýaşlar bilen duşuşyp, bu ugra höwes bildirýän nesliň ukyp-başarnyklaryny ýüze çykarmaga çalyşýarlar, olary höweslendirýärler, pikir-garaýyşlaryny beýan edýärler hem-de gymmatly maslahatlaryny berýärler.
Festiwal häzirki wagtda türki döwletleriň arasynda barha uly meşhurlyga eýe bolýar. Sebäbi ol doganlyk halklaryň kinematograflarynyň dostlaşmagyna hem-de ýakyn aragatnaşyk saklamaklaryna, özboluşly milli hem medeni aýratynlyklarymyz bilen tanyşmaga mümkinçilik döredýär.