Ýurdumyzyö mukaddes Garaşsyzlygynyň 30 ýyllygy mynasybetli “Türkmenistanyň nebit we gazy – 2021” (OGT 2021) – Halkara maýa goýum forumy 2021-nji ýylyň 12-13-nji maýynda Aşgabatda geçiriler. Çäräni guraýjylaryň web sahypasynda bu barada habar berilýär.
Bu möhüm halkara forumy “Türkmengaz” döwlet konserni tarapyndan “Türkmen forum” we “GaffneyCline” (Beýik Britaniýa) kompaniýalar topary bilen bilen bilelikde gurnalar. Halkara forumy – Türkmenistanyň nebitgaz pudagyna maýa goýumlaryny çekmek, Türkmenistanyň döwlet guramalary bilen halkara nebitgaz kompaniýalarynyň arasynda halkara hyzmatdaşlygyny ösdürmek we pugtalandyrmak maksady bilen geçirilen abraýly iş forumyna öwrüler.
Forumda Türkmenistanyň nebitgaz pudagyna maýa goýum mümkinçilikleri, iň soňky nebithimiýa taslamalary we taslama mümkinçilikleri barada jikme-jik maglumat berler we dünýäniň öňdebaryjy nebitgaz kompaniýalary öz tejribelerini paýlaşarlar.
Forumda ýangyç we energetika toplumynyň ösüşindäki global tendensiýalar, Türkmenistanyň energiýa diplomatiýasy, TOPH gaz geçirijisiniň durmuşa geçirilmegi, Hazar deňziniň türkmen bölegine maýa goýumlaryny çekmek, gaz-himiýa taslamalarynyň geljegi we ş.m. ýaly meseleler ara alnyp maslahatlaşylar.
Foruma Türkmenistanyň nebitgaz pudagynyň ýolbaşçylarynyň, öňdebaryjy halkara nebitgaz kompaniýalarynyň, şeýle hem iri halkara maliýe guramalarynyň wekilleriniň gatnaşmagyna garaşylýar.
Ýakynda geçiriljek forum barada has giňişleýin maglumat guramaçylaryň web sahypasynda berlendir: www.ogt-turkmenistan.com