Hormatly Prezidentimiz Gurbanguly Berdimuhamedow Ministrler Kabinetiniň Başlygynyň obasenagat toplumyna gözegçilik edýän orunbasarynyň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi.
Onda täze 2021-2022-nji okuw ýylyna görülýän taýýarlyklar barada hasabat berildi. Welaýatlaryň häkimleri 1-nji synpa barýan okuwçylara Türkmenistanyň Prezidentiniň adyndan kompýuterleri gowşurmak boýunça geçirilen işler barada habar berdiler.
Şeýle hem Ahal welaýatynyň häkimi umumybilim berýän mekdepleriň 5-sininiň ulanmaga beriljekdigini, Lebap welaýatynyň häkimi hem öz hasabatynda täze okuw ýylynyň başlanmagy mynasybetli dabaralary ýokary derejede geçirmäge görülýän taýýarlyk barada aýtmak bilen, welaýatda täze, döwrebap mekdepleriň 2-siniň açylmagynyň meýilleşdirilendigini habar berdi.
Döwlet Baştutanymyz täze okuw ýylynyň başlanmagy bilen bagly meselä aýratyn ünsi çekip, “Türkmenistan — parahatçylygyň we ynanyşmagyň Watany” ýylynda bellenilýän Diýarymyzyň mukaddes Garaşsyzlygynyň şanly 30 ýyllygynyň 1-nji synp okuwçylary üçin aýratyn ýatda galyjy waka bolmalydygyny belledi.