ABŞ-nyň daşary işler ministri Entoni Blinken 28-nji fewral-3-nji mart aralygynda Gazagystanda, Özbegistanda we Hindistanda saparda bolar. Bu barada ABŞ-nyň Döwlet departamentiniň metbugat gullugynyň ýolbaşçysy Neda Praýsyň ýazmaça beýanatynda bellenilip geçilýär.
Astana şäherinde ABŞ-nyň daşary işler ministri Entoni Blinken Gazagystanyň Prezidenti Kasym-Žomart Tokaýew we daşary işler ministri Muhtar Tleuberdi bilen duşuşar. Şeýle hem Astana şäherinde ABŞ-nyň we Merkezi Aziýanyň daşary işler ministrleriniň duşuşygy geçiriler. C5+1 formatyndaky köptaraplaýyn duşuşykda döwletleriň arasyndaky ykdysady, energetika, ekologiýa hyzmatdaşlygy we howpsuzlyk ulgamyndaky hyzmatdaşlyk gatnaşyklary ara alnyp maslahatlaşylar.
Şeýle hem Blinken Täjigistanyň, Gyrgyz Respublikasynyň we Türkmenistanyň wekiliýet ýolbaşçylary bilen duşuşyklar geçirer. Bu duşuşyklarda-da ikitaraplaýyn hyzmatdaşlyk ugurlary maslahatlaşylar.
Şondan soňra ABŞ-nyň daşary işler ministri Entoni Blinken Özbegistanda saparda bolar. Blinken 1-nji martda Nýu-Deli şäherine gidip, ol ýerde Uly-20-ligiň daşary syýasat edaralarynyň ýolbaşçylarynyň duşuşygyna gatnaşar.
Bu duşuşykda azyk we energetika howpsuzlygyna degişli meseleler ara alnyp maslahatlaşylar.