ARKADAG ŞÄHERI – YLHAM
Täze şähriň gutly bolsun Arkadagly Serdarymyz !
Ak mermerden bina eýläp, sena eýläp Watan adyn,
Toýlaryň ulusyn tutup, ýygnap dogan, ýakyn – ýadyn,
Arkadag bir şäher gurdy, artdyryp köňülleň şadyn,
Şöhratyň äleme dolsun, milli Lider merdanymyz,
Täze şähriň gutly bolsun Arkadagly Serdarymyz !
Etekläp Köpetdagymy, ýalkym saçýar giň jahana,
Kämil bir sungat eseri, zynatdyr gözel Ahala,
Egsilmez şöhratdyr-şandyr, Garaşsyz eziz Watana,
Çar tarapdan myhman gelsin, arşa ýaň salsyn adyňyz,
Täze şähriň gutly bolsun Arkadagly Serdarymyz !
Taýsyz yhlas, päk zähmet bar, synlasaň her daban ýerin,
Ägirtleň adyn göterip, ylym öýler saçýar bilim,
Göýä jennetiň parçasy, çar tarapa kylsaň seýil,
Bagşy joşup sazyn çalsyn, toýlar buşlar her çagymyz,
Täze şähriň gutly bolsun Arkadagly Serdarymyz !
Kümüş suwlar ýyldyraşyp, gözel tansyny oýnaýar,
Zybandan şygyrlar joşup, kalplarda ylham gaýnaýar.
Dag deresi güller guçup, bagynda guşlar saýraýar,
Beýle bagt barmy eýsem, Eremden zyýat bagymyz.
Täze şähriň gutly bolsun Arkadagly Serdarymyz !
Dünýäde “ Akylly şäher ” , Arkadag pähimli şäher,
Gül gujagy hoş owazly, howasy ýakymly şäher,
Dört möwsümi bahar ýazly, topragy asally şäher,
Ýollaryňa güller ýagsyn, beýik ile derkarymyz,
Täze şähriň gutly bolsun Arkadagly Serdarymyz !
Bahar Aýdogdyýewa
Magtymguly adyndaky Türkmen döwlet uniwersitetiniň
roman-german we gündogar dilleri fakultetiniň italýan dili we edebiýaty hünäriniň III ýyl talyby