Gyrgyzystanda Garaşsyz Döwletleriň Arkalaşygynyň Döwlet Baştutanlarynyň Geňeşiniň nobatdaky mejlisi geçirilýär. Onuň işine Türkmenistanyň Prezidenti Serdar Berdimuhamedow hem gatnaşýar.
Sammite gatnaşmak hem-de resmi sapar bilen Russiýa Federasiýasynyň Prezidenti Wladimir Putin düýn Gyrgyzystana bardy. Şeýle hem düýn agşam Azerbaýjanyň Prezidenti Ilham aliýew hem-de Belarusyň Prezidenti Aleksandr Lukaşenko bu sammite gatnaşmak üçin Bişkek şäherine bardylar.
Şu gün irden bolsa, Türkmenistanyň Prezidenti Serdar Berdimuhamedow bilen bir hatarda Täjigistanyň Prezidenti Emomali Rahmon, Özbegistanyň Prezidenti Şawkat Mirziýoýew, Gazagystanyň Prezidenti Kasym-Žomart Tokaýew Bişkek şäherinde bardylar.
Gyrgyz Respublikasynyň Prezidentiniň metbugat gullugynyň habar bermegine görä, 10-njy oktýabrda Gyrgyzystanyň Prezidenti Sadyr Žaparow bilen Ermenistanyň Premýer-ministri Nikol Paşinýanyň arasynda telefon arkaly söhbetdeşlik geçirilip, şonda Ermenistanyň hökümet başlygynyň bu sammite gatnaşyp bilmeýändigini mälim edendigi bellenildi.
GDA-nyň sammitinde Arkalaşygyň agza ýurtlarynyň arasynda söwda, ykdysady, medeni we ynsanperwer ugurlardaky hyzmatdaşlygyny giňeltmek we berkitmek üçin möhüm kararlaryň kabul edilmegine garaşylýar.