Şu ýylyň oktýabr aýynda Arkadag şäherinde Merkezi Aziýa döwletleriniň kinofestiwaly geçiriler. Bu barada Ministrler Kabinetiniň Başlygynyň orunbasary M.Mammedowa habar berdi.
“Watan” habarlar gepleşiginde bellenilip geçilişi ýaly, Ministrler Kabinetiniň sanly ulgam arkaly geçirilen mejlisinde “Arkadagyň säheri” atly kinofestiwala görülýän taýýarlyk barada hasabat berildi.
Ýurdumyzda kinematografiýa işiniň kämilleşdirilmegi, täze filmleriň döredilmegi we köpçülige görkezilmegi, bu ugurda dürli çäreleriň guralmagy, şeýle hem Türkmenistanyň wekilleriniň halkara kinofestiwallaryna gatnaşmagy üçin giň mümkinçilikler döredilýär.
Şu ýylyň 14-15-nji oktýabrynda geçirilmegi meýilleşdirilýän kinofestiwalynyň esasy maksady ýaş zehinleri ýüze çykarmakdan, türkmen kino sungatyny ösdürmekden, ösüş gelýän ýaş nesli watançylyk ruhunda terbiýelemekden, şeýle hem dünýä jemgyýetçiligini sanly ulgamyň mümkinçilikleri, iň häzirki zaman tehnologiýalary ornaşdyrylan Arkadag şäheri bilen tanyşdyrmakdan, daşary ýurtly hyzmatdaşlar bilen netijeli gatnaşyklary ösdürmekden ybaratdyr.