Türkmenistanyň futbol boýunça milli çempionatynyň 29-njy möwsüminde birinji aýlawyň duşuşyklary tamamlandy. Aýlawyň jemleýji, tutuş möwsümiň bolsa 7-nji tapgyrynyň duşuşyklarynyň ikisi Aşgabat, galan ikisi bolsa Mary we Balkanabat şäherlerinde geçirildi.
Paýtagtymyzdaky «Aşgabat» stadionynda bolan duşuşykda «Aşgabat» futbol topary Türkmenbaşy şäheriniň «Şagadamyny» kabul etdi. Yzda galan alty tapgyryň netijesi boýunça ýaryş tertibiniň ikinji ornuna çenli göterilen kenarýaka şäheriň topary şu duşuşykda hem ýeňiş gazanyp bilse, Birinji aýlawy ikinji basgançakda jemläp biljekdi. Ýöne ýerli futbolçylar muňa rugsat bermediler. Hatda, «Aşgabat» duşuşygyň 15-nji minudynda Gurbangeli Sähedowyň geçiren pökgüsi bilen öňe-de saýlandy. Birinji ýarymy ýer eýeleriniň 1:0 hasabyndaky öňdeligi bilen tamamlanan duşuşygyň 57-nji minudynda Kerim Hojaberdiýew «Şagadama» deňlik getiren pökgini geçirdi. Şondan soň iki tarap hem ýiti hüjümleriň birnäçesini guran-da bolsa, hasaby üýtgetmek olaryň hiç haýsyna-da başartmady. Duşuşyk 1:1 hasabyndaky deňlik bilen tamamlandy.
Balkanabat şäherinde geçirilen duşuşykda ýerli «Nebitçi» soňky ýedi möwsümiň çempiony «Altyn asyry» kabul etdi. Möwsümde janköýerleriniň garaşýan netijelerini gazanmakda kynçylyk çekýän «Altyn asyr» bu duşuşykda hem derwezesinde ilkinji bolup pökgi gören tarap boldy. 23-nji minutda «Nebitçiniň» ýarym goragçysy Alibek Abdyrahmanow «aragatnaşykçylaryň» derwezesinden pökgi geçirip, ýer eýelerini öňe saýlady. Ýöne Türkmenistanyň at gazanan tälimçisi Ýazguly Hojageldiýewiň şägirtleri dessine özüni dürsäp, 27-nji minutda Begmyrat Baýowyň tapawutlanmagynda ýer eýelerine jogap berdiler. Şondan 7 minut soňra Merdan Muhadow «Altyn asyry» öňe saýlan pökgini geçirdi. Şu pökgi hem duşuşygyň ykbalyny kegitledi. «Nebitçi» öz meýdanynda «Altyn asyrdan» 1:2 hasabynda asgyn geldi.
«Aşgabat» stadionynda «Köpetdag» bilen «Energetigiň» arasynda geçirilen duşuşygyň esasy aýratynlygy ýer eýeleriniň möwsümdäki ilkinji ýeňşi boldy. Juda bir kän utulmasa-da (ýedi duşuşykda iki utulyş), «Köpetdag» möwsümdäki ilkinji ýeňşi üçin Birinji aýlawyň soňky tapgyryna çenli garaşmaly boldy. Ýöne bu ýeňiş ýeňiş şekillili ýeňiş hem boldy. «Köpetdag» garşydaşyny 4:1 hasabynda utdy.
Ýer eýeleri birinji ýarymy Bagtyýar Gürgenowyň 8-nji, Begenç Akmämmedowyň 12-nji minutlarda geçiren gollary bilen 2:0 hasabynda öňde tamamlandy. «Energetik» 55-nji minutda Garly Garlyýewiň tapawutlanmagynda hasaby ýygran hem bolsa, toparyň bu umydy 72-nji minuda çenli dowam etdi. Şol minutda Elýas Akyýew «Köpetdagyň» üçünji pökgüsini hem geçirdi. Duşuşykdaky soňky pökgini goşmaça wagtyň 3-nji minudynda «Köpetdagyň» futbolçysy Ýagşysähet Döwletgeldiýew geçirdi. Şeýlelikde, duşuşyk 4:1 hasabynda «Köpetdagyň» ýeňşi bilen tamamlandy.
Ýaryşyň öňdebaryjysy «Ahal» 7-nji tapgyrda «Merwiň» myhmany boldy. Myhmanlar 3-nji minutda Arslanmyrat Amanowyň 11 metrlik jerime urgusyndan dürs peýdalanmagy bilen öňe geçdi. Olaryň bu üstünligi duşuşygyň ahyrky minutlaryna çenli dowam etdi. Ýöne obnuň gidişini we umydy elden bermedik «Merw» 88-nji minutda Amangeldi Saparowyň geçiren pökgüsi bilen hasaby deňledi. Duşuşyk 1:1 hasabyndaky deňlik bilen tamamlandy.
Şeýlelikde, birinji aýlawyň diňe ilkinji we iň soňky duşuşygynda utuk ýitiren «Ahal» ýedi oýunda toplan 17 utugy bilen aýlawy birinji orunda tamamlady. Bäş duşuşykda ýeňiş gazanyp, iki duşuşykda garşydaşlaryndan asgyn gelen «Altyn asyr» 15 utuk toplap bildi. Öňdebaryjylaryň ilkinji üçlügini 14 utuk bilen «Şagadam» jemleýär.
26-njy noýabrda başlanjak ikinji aýlawda toparlar biri-biri bilen ýene bir gezek duşuşar. Iki aýlawyň netijesinde iň köp utuk toplap bilen topar Türkmenistanyň futbol çempionatynyň 29-njy möwsüminiň çempiony bolar we geljek ýylda yklymyň klublaýyn ýaryşlarynda ýurdumyza wekilçilik etmek hukugyna eýe bolar.