Düýn ― 8-nji noýabrda Türkmenistanyň futbol çempionatynyň Ýokary ligasynda 4-nji tapgyryň duşuşyklary geçirildi. Olarda «Ahal» «Şagadamy», «Energetik» «Merwi», «Nebitçi» «Aşgabady», «Altyn asyr» bolsa «Köpetdagy» kabul etdi.
«Ahal» möwsümdäki iň uly hasaply ýeňşi gazandy
Paýtagtymyzdaky «Aşgabat» stadionynda geçirilen duşuşykda «Ahal» «Şagadamy» uly hasap bilen ýeňdi. 4-nji tapgyra çenli ýaryş tertibiniň ilkinji iki basgançagyny paýlaşýan toparlaryň özara duşuşygy «Ahalyň» 4:0 hasabyndaky ýeňşi bilen tamamlandy.
Duşuşykdaky gollaryň perdesini 12-nji minutda tejribeli ýarym goragçy Elman Tagaýew açdy. Ikinji pökgini 38-nji minutda Didar Durdyýew geçirdi. Şeýlelikde, ol möwsümde ilkinji gezek tapawutlandy.
Birinji ýarymy «Ahalyň» 2:0 hasabyndaky üstünligi bilen tamamlanan duşuşygyň 82-nji minudynda Elman Tagaýew ýene bir 11 metrlik jerime urgusyndan dürs peýdalanyp, hasaby 3:0-a çykardy. Duşuşykdaky ahyrky pökgini 87-nji minutda Amir Gurbany geçirdi.
Bu duşuşykdan soňra utugyny 13-e çykaran «Ahal» ýaryş tertibiniň başyny ynam bilen çekýär. 7 utukly «Şagadam» bolsa üçünji orna düşdi.
«Energetik» goşmaça minutlarda utuldy
Mary şäherinde geçirilen derbi duşuşygynda «Energetik» «Merwi» kabul etdi. Ýer eýeleri duşuşygyň 60 minudyna çenli «Merwiň» derwezesinden iki pökgi geçiren hem bolsalar (Perman Hallyýew, 42-nji minut; Tirkeş Muhammetberdiýew, 59-njy minut), bu üstünligi soňky ýarym sagatlyk wagtda saklap bilmediler. Hatda, «Merwden» 2:3 hasabynda ýeňildilerem.
70-nji minutda Amangeldi Saparow «Merwiň» şu duşuşykdaky ilkinji goluny geçirdi. Duşuşyk 2:1 hasabynda hem tamamlanyp bilerdi. Ýöne 90-njy minutda Döwletgeldi Mirsultanowyň hasaby deňlemegi «energetikleriň» keýpine sogan dogrady. Olary möwsümdäki üçünji ýeňlişine sezewar eden goly bolsa Döwletmyrat Döwletmyradow geçirdi.
Şeýlelikde, duşuşyk 3:2 hasabynda «Merwiň» ýeňşi bilen tamamlandy. Bu ýeňişden soň utugyny 4-e çykaran «Merw» ýaryş tertibinde bir basgançak beýgelip, altynjy orna çykdy. 1 utukly «Energetik» bolsa ýaryşyň iň aşaky basgançagynda galdy.
«Nebitçiniň» ilkinji ýeňşi
Balkanabat şäherinde geçirilen «Nebitçi» ― «Aşgabat» duşuşygy ýerli toparyň möwsümdäki ilkinji ýeňşine beslendi. Duşuşykdaky ýeke-täk pökgini 73-nji minutda ýarym goragçy Guwanç Abylow geçirdi.
«Nebitçä» 88-nji minutda has öňe saýlanmaga-da mümkinçilik döredi. Ýöne Merdan Gurbanow 11 metrlik jerime urgusyny takyk ýerine ýetirip bilmedi.
Bu ýeňiş bilen utugyny 5-e çykaran «Nebitçi» ýaryş tertibinde «Aşgabat» bilen ornuny çalşyp, dördünji orna beýgeldi. Paýtagtyň 4 utukly adybir topary bolsa bäşinji orna düşdi.
«Altyn asyr» üçünji ýeňşini gazandy
Büzmeýin etrabyndaky Sport toplumynda geçirilen duşuşykda «Altyn asyr» möwsümdäki üçünji ýeňşini gazandy. «Köpetdagy» kabul eden «aragatnaşykçylaryň» duşuşygyň 2:1 hasabynda öz haýryna tamamlanmagyny gazanyp bildiler.
«Altyn asyr» 20-nji minutda Altymyrat Annadurdyýewiň geçiren pökgüsi bilen öňe saýlandy. Ýöne bu üstünlik bary-ýpgy 7 minut dowam etdi. 27-nji minutda Döwletmyrat Seýitmuhammedow hasaby deňledi. 36-njy minutda emin Babanazar Haknazarowyň bellän 11 metrlik jerime urgusyndan dürs peýdalanan Altymyrat Annadurdyýew toparyny ýene öňe saýlady. Şeýlelikde, duşuşyk birinji ýarymda geçirilen gollar bilen 2:1 hasabynda «Altyn asyryň» ýeňşi bilen tamamlandy.
Bu ýeňiş utugyny 9-a çykaran «aragatnaşykçylary» ikinji orna göterdi. 3 utukly «Köpetdag» bolsa ýedinji orna çenli aşak düşdi.
Indiki duşuşyklar 12-nji noýabrda
Ýurdumyzyň futbol çempionatynyň 5-nji tapgyry 12-nji noýabrda geçirilip, onda «Şagadam» – «Energetik» hem-de «Merw» – «Nebitçi» toparlary duşuşarlar. Bu tapgyryň çägindäki iki duşuşyk 20-nji hem-de 22-nji oktýabrda geçirilip, onda «Aşgabat» – «Altyn Asyr» (1:3) hem-de «Köpetdag» – «Ahal» (1:1) toparlary duşuşypdylar.
Şeýle-de, 12-nji noýabrda birinji tapgyryň wagty süýşürilen duşuşygy («Köpetdag» – «Aşgabat») hem geçiriler.
9-njy noýabr ýyldyzlar näme diýýär? Gündelik Täleýnama