Bütindünýä Çagalar güni (ispança-Día Universal del Niño, fransuzça-Journée mondiale de l’enfance) 1954-nji ýylda Birleşen Milletler Guramasynyň Baş Assambleýasynyň 836-njy Rezolýusiýa bilen döredildi. Bu baýramçylyk 1956-njy ýyldan bäri bellenilýär.
Bütindünýä Çagalar güni çagalaryň abadançylygyny üpjün etmäge, olaryň howpsuzlygyny ýokarlandyrmaga, BMG tarapyndan dünýädäki çagalaryň bähbidine alnyp barylýan işleri güýçlendirmäge gönükdirilendir. Baş Assambleýa bu baýramçylygy her döwletiň özüne laýyk hasaplaýan görnüşinde we öz kabul eden gününe görä bellemegi teklip etdi. Şeýle-de Baş Assambleýa öz karary bilen Bütindünýä çagalar gününiň ählumumy bellenilmeginiň halklaryň agzybirligini we hyzmatdaşlygyny berkitmäge hyzmat etjekdigini aýtdy.
BMG-niň resminamalarynda 20-nji noýabrda Bütindünýä çagalar gününi bellemek baradaky düzgünler düzgünleşdirilýär. Şeýle-de 20-nji noýabr taryhda 1959-njy ýylda “Çaganyň Hukuklary barada Jarnamanyň” we 1989-njy ýylda “Çaganyň Hukuklary hakyndaky Konwensiýanyň” kabul edilen günüdir
Ýurtlar boýunça aýratynlykda alanymyzda, Russiýa Federasiýasynda, Azerbaýjanda, Ermenistanda, Belarusda, Gazagystanda, Türkmenistanda, Gyrgyzystanda, Moldowada 1-nji iýunda Çagalary goramagyň halkara güni bellenilýär. Panamada bolsa bu baýramçylyk iýulyň üçünji ýekşenbesinde bellenilip geçilýär.
Laçyn Babamuradowa,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň
2-nji ýyl talyby.
Ýurdumyzda we dünýäde bolup geçýän ykdysadyýete degişli täzeliklerden “habardar” bolmak isleýän bolsaňyz, bu sahypa Siziň üçin!
