Elektrikli aragatnaşyk kompaniýasy bolan «Türkmentelekom» wirtual enjamlar (WE) üçin täze funksiýalaryň girizilendigini yglan etdi. Indi müşderilere sanly taslamalaryň maglumatlarynyň howpsuzlygyny we bozulma garşy çydamlylygyny üpjün edýän ätiýaçlyk nusgasyny (backup) dörediş ulgamy elýeterlidir. Bu barada «Altyn asyr» elektron gazeti habar berýär.
Ätiýaçlyk nusgasyny dolandyrmak doly awtomatlaşdyrylan we şahsy otaglarda elýeterlidir. Ilki bilen, https://os.telecom.tm/signin salgysyndaky dolandyryş panelinde özüňi awtorlaşdyrmaly. Soňra işjeň çeşmeleriň sanawynyň görkezilýän «Enjamlar» bölüminde, wirtual enjamyň adynyň sag tarapyndaky özara täsir düwmesine basmaly – şonuň üsti bilen ätiýaçlyk nusgasyny döretmek bolýar.
Bu ulgam diňe bir häzir arhiwdäki enjamy dikeltmäge däl, eýsem şol bir bölümdäki funksiýa düwmesi arkaly bar bolan nusgalara esaslanýan birmeňzeş täze çeşmeleri açmaga hem mümkinçilik berýär.
Hyzmatyň bahasy maglumat möçberine baglydyr we sagat boýunça hasaplanýar:
Maglumat möçberi: 0 – 60 GB: sagatda 0.58 TMT;
Maglumat möçberi: 61 – 120 GB: sagatda 1.16 TMT;
Maglumat möçberi: 121 – 200 GB: Sagatda 1.93 TMT;
Maglumat möçberi: 201 we ondan köp GB: Sagatda 2.89 TMT.
Domeni dolandyryş paneline birikdirmek üçin, ulanyjy hosting dolandyryş paneliniň we domeniň eýesiniň adyndan müşderi hyzmaty bölümine resmi hat ibermelidir. Hukuklary tassyklananyndan soň, tehniki bölümiň hünärmenleri domeni şahsy otaga birikdirerler.