Türkmenistanyň futzal boýunça zenanlar ýygyndysy Aziýa Kubogy – 2025-iň saýlama tapgyryna gatnaşmak üçin Özbegistana ugur aldy.
Ýeri gelende bellesek, bije çekişligiň netijesinde ýygyndy toparymyz «C» toparça düşdi. Bu toparçada türkmenistanly futzalçy zenanlardan başga-da, toparçanyň ýer eýesi bolan ― Özbegistanyň, Awstraliýanyň, Filippinleriň we Kuweýtiň ýygyndylary bar. Zenanlar ýygyndymyzyň tälimçiler düzüminiň saýlama tapgyrynda çykyş etmek üçin oýunçylaryň 14-sini çagyrandyklaryny bellemek gerek.
Yklym ýaryşynyň saýlama tapgyrynyň «C» toparçasynyň duşuşyklary 11-19-njy ýanwary aralygynda merkezleşdirilen görnüşinde Özbegistanyň paýtagty Daşkent şäherinde geçiriler.
Saýlama tapgyrynyň çäginde geçirilýän toparçalarda ilkinji iki orny eýelän ýygyndylar hem-de üçünji orny eýelän ýygyndylaryň iň gowy netije görkezeni Aziýa Kubogynyň final tapgyrynda çykyş etmäge mümkinçilik alar.
Milli ýygyndymyz saýlama tapgyryndaky ilkinji duşuşygyny 11-nji ýanwarda Awstraliýanyň ýygyndy toparynyň garşysyna geçirer.
Aziýa Kubogy – 2025-iň final tapgyry 2025-nji ýylyň maý aýynda Hytaýda geçirilmegi meýilleşdirilýär.