Katar Döwletiniň paýtagty Dohada Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýewiň we Katar döwletiniň Daşary işler ministrliginiň Diplomatiýa institutynyň direktory, jenap Abdulaziz bin Muhammed al-Horr arasynda duşuşyk geçirildi.
Duşuşygyň dowamynda Gurbangeldiýew iki ýokary okuw jaýlarynyň arasyndaky hyzmatdaşlygy berkitmek maksady bilen birnäçe teklipleri hödürledi. Olaryň arasynda özara kitaphana hyzmatdaşlygyny ýola goýmak, onlaýn görnüşinde ylmy seminarlary, maslahatlary geçirmek, halkara gatnaşyklaryna degişli edebiýatlaryň arap dilindäki neşirleri Türkmenistanyň Halkara gatnaşyklary institutynyň ylmy kitaphanasyna gowşurmak başga-da birnäçe teklipler girýär.
Iki ýokary okuw mekdepleriň arasynda hyzmatdaşlygy has-da işjeňleşdirmek maksatlary bilen türkmen tarapyndan taýýarlanan hyzmatdaşlyk etmek boýunça “Ýol kartasynyň” taslamasyna hem garaldy.
Duşuşygyň ahyrynda Türkmenistanyň we Kataryň arasyndaky medeni-ynsanperwer we ylym-bilim gatnaşyklary mundan beýläk berkidiljegine ynam bildirildi.