Aziýa ýurtlarynyň ýokary okuw mekdepleriniň “THE Aziýa baýragy-2024” sammiti 29-njy apreli 1-nji maý aralygynda üç günläp dowam etdi. Bu sammite THE Aziýa baýragy-2024 baýragyna dalaşgär uniwersitetleriň gysga sanawyna “Uniwersitede zehinli dalaşgärleri çekmek” ugry boýunça giren ýokary okuw mekdebi hökmünde Türkmenistanyň Oguz han adyndaky Inžener-tehnologiýalar uniwersitetiniň mugallymlary hem gatnaşdy.
Türkmenistanyň Oguz han adyndaky Inžener-tehnologiýalar uniwersitetiniň mugallymlary Malaýziýa iş saparynyň çäginde Aziýa ýurtlarynyň ýokary okuw mekdepleriniň sammitindäki birnäçe çykyşlara, pikir alyşmalara, tegelek stollara we nusgalyk sapaklara gatnaşdy.
Mundan başga-da, Türkmenistanyň Oguz han adyndaky Inžener-tehnologiýalar uniwersitetiniň mugallymlary Malaýziýa iş saparynyň dowamynda Universiti Tenaga Nasional (UNITEN) uniwersitetinde geçirilen duşuşykda iki uniwersitetiň özara hyzmatdaşlygy, geljekde göz öňünde tutulýan meýilnamalar, alnyp baryljak ylmy-gözleg işleri barada maslahat edildi.
Şeýle hem “Gymmatlyklara esaslanýan jemgyýeti ösdürmegiň maksatnamasy: “Sunway Desa Mentari” jemgyýetçilik obserwatoriýasynyň mysalynda ýörite syýahat gurnalyp, Sunway uniwersitetiniň ýerine ýetirýän işleri bilen ýakyndan tanyşdyryldy.
Sammitiň gurnajy agzalary, beýleki Aziýa uniwersitetleriniň wekilleri, Türkmenistanyň Oguz han adyndaky Inžener-tehnologiýalar uniwersiteti bilen ýakyndan hyzmatdaşlyk etmäge gyzyklanmalarynyň uludygyny beýan etdiler
THE Aziýa baýaragy– THE (Times higher education) guramasy tarapyndan 2019-njy ýylda halkara derejesinde geçirilip başlandy we “Ýokary bilimiň Oskary” ady bilen tanalýar. Bu baýrak yklymyň ýokary derejeli öňegidişligini we toplumlaýyn netijeliligini ykrar edýän hem-de ýokary bilim berlişiniň hilini bahalandyrýan esasy halkara baýrakdyr.
Ýeri gelende belläp geçsek, Türkmenistanyň Oguz han adyndaky Inžener-tehnologiýalar uniwersiteti Türkmenistanyň we Merkezi Aziýa ýurtlarynyň ýokary okuw mekdepleriň arasynda ilkinji bolup bu sanawa girmegi başaran uniwersitetdir.