Şu gün Ankarada hormatly Prezidentimiziň resmi saparyna gabatlanyp, Türkmen-türk işewürlik maslahaty geçirildi. Türkiýäniň Palatalar we biržalar birleşiginiň merkezi edarasynda geçirilen forumyň açylyş dabarasyna döwlet Baştutanymyz Serdar Berdimuhamedow gatnaşdy. Şeýle hem bu maslahata türk tarapyndan – Türkiýe Respublikasynyň Prezidentiniň orunbasary Jewdet Ýylmaz, senagat we tehnologiýa ministri Mehmet Fatih Kajyr, Türkiýe Respublikasynyň Palatalar we biržalar birleşiginiň başlygy Rifat Hisarjyklyoglu gatnaşdy.
Bu maslahatda edilen çykyşlarda birnäçe möhüm sanlar we maglumatlar beýan edildi. Şol maglumatlara görä:
- Türkmen-türk söwda möçberini 5 milliard dollara ýetirmek maksat edinilýär.
- 2022-nji ýylda söwda dolanyşygynyň möçberi 2,1 milliard dollara barabar boldy.
- 2023-nji ýylda söwda dolanyşygy 3 milliard dollara golaýlar.
- Türkmenistan türk potratçylyk kompaniýalarynyň iň köp iş alyp baran ýurdudyr.
- Häzirki wagta çenli türk kompaniýalarynyň Türkmenistandaky taslamalarynyň möçberi 50 milliard dollardan geçdi.
- Türk kompaniýalary Türkmenistanda 2 müňe golaý dürli taslamalary amala aşyrdy.
- Arkadag şäheri we beýleki möhüm taslamalara türk kompaniýalary gatnaşmaga taýýar.
- “Ýaşyl” taslamalar boýunça Türkmenistan bilen hyzmatdaşlyk etmäge gyzyklanma bildirilýär.
- Kiçi we orta kärhanalary ösdürmek we goldamak boýunça müdirligi (KOSGEB) bilen Türkmenistanyň Senagatçylar we telekeçiler birleşmesiniň arasynda kiçi we orta telekeçilik babatda hyzmatdaşlyk etmegiň hereket meýilnamasy kabul edilýär.