2024-nji ýylyň 8-13-nji sentýabry aralygynda Gazagystan Respublikasynyň Astana şäherinde geçirilýän Çarwadarlaryň V Bütindünýä oýunlarynda türkmenistanly türgenler ilkinji medallaryny gazandylar. Bu barada Türkmenistanyň Bedenterbiýe we sport baradaky döwlet komitetiniň resmi saýtynda habar berilýär.
Türkmenistanyň kuraş boýunça milli ýygyndysynyň türgeni, Lebap welaýatynyň Kerki etrabynyň 22-nji orta mekdebiniň bedenterbiýe mugallymy Daýanç Omirow 81 kilogram agram derejesinde çykyş edip, kümüş medala mynasyp boldy.
Türkmenistanyň guşakly göreş boýunça ýygyndysynyň türgeni, Türkmenistanyň Içeri Işler ministrliginiň işgäri Silapberdi Nuryýew gazak göreşi boýunça 82 kilogram agram derejesinde başarnygyny görkezip, bürünç medalyň eýesi boldy.
Türkmenistanly türgenler Çarwadarlaryň V Bütindünýä oýunlarynda sportuň alyş göreşi, gazak göreşi, koreş, kuraş, adaty ýaý atmak we toguzkumalak ýaly görnüşleri boýunça çykyş edýärler. Türkmenistanyň ýygyndysynyň düzüminde 29 türgen medallar ugrunda göreşýär.