Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow «Bir guşak, bir ýol» üçünji ýokary derejeli maslahatyna gatnaşmak üçin Hytaý Halk Respublikasyna iş sapary bilen bardy.
Pekin şäheriniň «Şoudu» Halkara howa menzilinde mertebeli türkmen myhmanynyň hormatyna aýdym-sazly çykyşlara giň orun berlip, dabaraly ýagdaý emele geldi. Howa menzilinde Gahryman Arkadagymyz Gurbanguly Berdimuhamedowy hytaý tarapynyň resmi adamlary, şeýle-de Türkmenistanyň wekiliýetiniň agzalary garşyladylar. Milli Liderimiziň Pekine maşgalasy we agtyklary bilen gelmegi bolsa barha berkeýän dost-doganlyk gatnaşyklarynyň nyşanyna öwrüldi.
Mälim bolşy ýaly, 17-18-nji oktýabrda Pekinde «Bir guşak, bir ýol» üçünji ýokary derejeli maslahaty geçiriler. Bu hyzmatdaşlyk forumy ýylyň dowamynda Hytaýda geçirilýän iň möhüm diplomatik çäre bolup, «Bir guşak, bir ýol» başlangyjynyň 10 ýyllygynyň çäginde guralýar. Oňa dünýäniň 140 döwletinden, halkara guramalaryň hem 30-dan gowragyndan wekilleriň gatnaşmagyna garaşylýar. Forumyň açylyş dabarasynda Hytaý Halk Respublikasynyň Başlygy Si Szinpin we käbir beýleki wekiliýet Baştutanlary çykyş eder. Oňa Gahryman Arkadagymyz Gurbanguly Berdimuhamedowyň ýolbaşçylygyndaky türkmen wekiliýeti hem gatnaşar.
Saparyň çäginde Türkmenistanyň Halk Maslahatynyň Başlygy Gurbanguly Berdimuhamedow «Bir guşak, bir ýol» üçünji ýokary derejeli maslahatyna gatnaşar we Hytaý Halk Respublikasynyň Başlygy Si Szinpin bilen duşuşyk geçirer.
Türkmen-hytaý hyzmatdaşlygy uzak möhletleýin häsiýete eýe bolup, ýurtlarymyz tarapyndan gol çekilen strategik hyzmatdaşlygy ýola goýmak barada bilelikdäki Jarnama laýyklykda guralýar. Şu ýylyň ýanwar aýynda Türkmenistanyň Prezidenti Serdar Berdimuhamedowyň Hytaýa bolan döwlet saparynyň we şol saparda HHR-iň Başlygy Si Szinpin bilen geçiren duşuşygynyň netijeleri boýunça iki ýurduň arasyndaky gatnaşyklaryň derejesiniň hemmetaraplaýyn strategiki hyzmatdaşlyga tarap ýokarlanjakdygy barada habar berildi.
«Bir guşak, bir ýol» üçünji ýokary derejeli maslahaty Merkezi Aziýanyň, Ýewropanyň we Afrikanyň 60-dan gowrak ýurduny birleşdirýän täze söwda-transport geçelgelerini döretmek, häzirki hereket edýänlerini bolsa kämilleşdirmek boýunça Hytaýyň halkara başlangyjy bolup durýar. Şeýle hem maslahat şol ýurtlar bilen Hytaýyň arasyndaky söwda gatnaşyklarynyň ösmegine ýardam berer.