Türkiýede bilim alýan ýa-da indi bilim almak üçin Türkiýä gitmek isleýän talyplar üçin wajyp habar mälim edildi. Türkiýe bilen ýakyndan gyzyklanýanlar türk dilinde “ikamet” diýilýän, ýagny Türkiýede wagtlaýyn ýaşamak üçin rugsatnama almak bilen baglanyşykly täze düzgün kabul edildi. Aslynda bu täze düzgün esasan hem talyplary gyzyklandyrýar.
Türkiýäniň Migrasiýa edarasynyň web saýtynda talyplaryň wagtlaýyn ýaşamak üçin rugsatnama almaga barada bildiriş çap edildi.
Onda hususan-da şeýle diýilýär:
2023-nji ýylyň 29-njy noýabrynda güýje giren ÝÖK, ýagny Türkiýäniň Ýokary bilim edarasy bilen Türkiýäniň Içeri işler ministrliginiň arasynda gol çekilen teswirnama laýyklykda, talyplar üçin wagtlaýyn ýaşamak üçin rugsatnama ýüz tutýan bakalawrdan öňki bilim, bakalawr, magistrlik we doktorantura bilim derejeleri boýunça talyplar talyp ikamet rugsatnamasyna ýüz tutandan soňra ikamet rugsatnama talyp hasaba alyş sowalnamasy bilen bilelikde zerur bolan resminamalary nobatyna garaşmazdan, hasaba duran uniwersitetiniň Halkara talyplar bölümine tabşyrmalydyr.
Türkiýäniň Ýokary bilim edarasy bilen Türkiýäniň Içeri işler ministrliginiň arasynda gol çekilen tewsirnama laýyklykda, halkara talyplaryň wagtlaýyn ýaşamak üçin rugsatnama almagyna ýeňillik döredildi.
Talyp onlaýn hökmünde ikamet üçin sowalnamany doldurýar we şol ýerde zerur bolan resminamalary öz okaýan ýokary okuw mekdebine tabşyrýar. Ýokary okuw mekdebiniň talpylar bölümi bu ugurda Türkiýäniň degişli edaralar bilen zerur bolan işleri geçirýär.
Häzirki wagtda Türkiýede bilim alýan daşary ýurtly talyplaryň sany sonky 20 ýylda yzygiderli ýokarlanýar. 2023-2024-nji okuw ýylynda Türkiýede 198 döwletden talyp bilim alýar. Türkiýe Respublikasy dünýäde iň köp daşary ýurtly talyp kabul eden we bilim beren ýurtlaryň sanawynda birinji onluga girýär.